განათლების, მეცნიერების, კულტურისა და სპორტის მინისტრის, მიხეილ ბატიაშვილის განცხადებით, თუ გამოძიების შემდეგ დადგება სამინისტროს ან მისი პასუხისმგებლობის საკითხი ზუგდიდის მე-6 საჯარო სკოლის გარდაცვლილი დირექტორის, ია კერზაიას საქმეში, ის მზად არის თანამდებობა დატოვოს.
„როგორც იცით, მიმდინარეობს გამოძიება, რომელიც ამ მიმართულებით საკმაოდ აქტიურად მუშაობს. პირველივე დღიდან ვამბობდი, როგორც კი სამინისტროს ან ჩემი არა მარტო იურიდიული, არამედ მორალური პასუხისმგებლობა გახდება საჭირო, მზად ვარ, დავტოვო თანამდებობა. ამას ვაცხადებდი პირველივე დღიდან“, - განაცხადა ბატიაშვილმა.
კითხვაზე, ხომ არ სთხოვა მიხეილ ბატიაშვილს ინსპექტირების ჯგუფის გაგზავნა ზუგდიდის სკოლაში გიორგი გახარიამ, ბატიაშვილმა უპასუხა, რომ „არანაირი ასეთი ინფორმაცია არ ყოფილა".
ცნობისთვის, ზუგდიდის მე-6 საჯარო სკოლის გარდაცვლილი დირექტორის, ია კერზაიას შვილი ბაჩანა შენგელია ინტერესდება, ხომ არ იყო სკოლაში ინსპექტირების ჯგუფის გაგზავნა შეთანხმებული შინაგან საქმეთა მინისტრთან და ამის გადამოწმებას ითხოვს.