დევიდ კრემერი - პუტინის რეჟიმი დაინტერესებულია, რომ საქართველოს შიგნით საზოგადოება დაიყოს და ქართველები ერთმანეთს დაუპირისპირდნენ - ქართველებმა უნდა შეძლონ, რომ ამ მახეში არ გაებან

ქართველებმა უნდა გააცნობიერონ, რომ როცა ერთმანეთის წინააღმდეგ ასეთ რამეებზე იბრძვიან, ამით კრემლს ეხმარებიან. პუტინის რეჟიმი დაინტერესებულია იმით, რომ საქართველოს შიგნით საზოგადოება დაიყოს და ქართველები ერთმანეთს დაუპირისპირდნენ,- ამის შესახებ „ამერიკის ხმის“ ქართული რედაქციისთვის მიცემულ კომენტარში ფლორიდის საერთაშორისო უნივერსიტეტის პროფესორმა და ამერიკის სახელმწიფო მდივნის ერთ-ერთმა ყოფილმა თანაშემწემ დევიდ კრემერმა განაცხადა.

დევიდ კრემერი „რუსთავი 2“-ის ჟურნალისტის გიორგი გაბუნიას მონოლოგს გამოეხმაურა და აღნიშნა, რომ „გაბუნიას კომენტარები არაპროფესიონალური და უპასუხისმგებლო იყო“.

კრემერის თქმით, „რუსთავი 2“-ის მიერ გაბუნიას პროფესიული პასუხისმგებლობის დროებითი შეჩერება „მართებული იყო,“ თუმცა დასძენს, რომ „ამ ინციდენტმა „რუსთავი 2“-ის კრიტიკოსებს კრიტიკის საბაბი მისცა“.

„ნებისმიერ დემოკრატიულ საზოგადოებაში ჯანსაღია, თუმცა ქართველებმა უნდა გააცნობიერონ, რომ როცა ერთმანეთის წინააღმდეგ ისეთ რამეებზე იბრძვიან, ამით კრემლს ეხმარებიან. პუტინის რეჟიმი დაინტერესებულია იმით, რომ საქართველოს შიგნით საზოგადოება დაიყოს და ქართველები ერთმანეთს დაუპირისპირდნენ. ქართველებმა უნდა შეძლონ ის, რომ ამ მახეში არ გაებან“,- განაცხადა კრემერმა.

რაც შეეხება მთავრობის განცხადებებს ჟურნალისტის განცხადებაზე, კრემერის თქმით, „მთავრობასაც აქვს უფლება საკუთარი მოსაზრება გააჟღეროს იმაზე, რაც ჟურნალისტმა თქვა“.

„თუმცა, „რუსთავი 2“- ის გადასაწყვეტია ის, თუ რა რეაგირებას გააკეთებს, რადგან „რუსთავი 2“ კერძო კომპანიაა და არა მთავრობის მფლობელობაში მყოფი ან მის მიერ კონტროლირებული მედია. მთავრობამ ეს არ უნდა გამოიყენოს მედიის წინააღმდეგ ზომების გამკაცრების საბაბად“,- აღნიშნა კრემერმა.

ასევე, დევიდ კრემერის განცხადებით, „კრემლი და მისი პროპაგანდისტები არ არიან იმ პოზიციაში, რომ საქართველოში მომხდარის გამო ვინმე აკრიტიკონ“.

„რუსეთის ჯარი აგრძელებს საქართველოს ტერიტორიის 20 პროცენტის ოკუპაციას მას შემდეგ, რაც 2008 წელს საქართველოში შეიჭრა. გავრილოვი პროვოკაციის ნაწილია და იმსახურებს მკაცრ კრიტიკას იმისთვის, რაც საქართველოს პარლამენტში გააკეთა. ამაზე პასუხად კი, პუტინმა ვაჭრობა და ფრენები შეწყვიტა“, - განაცხადა კრემერმა.

კახა გოგოლაშვილი - როცა სტაბილიზაციისკენ მიმართული ნებისმიერი კონსტრუქცია ინგრევა, იქ სამოქალაქო დაპირისპირების საფრთხეც არსებობს
ქართული პრესის მიმოხილვა 29.07.2021
ლევან ალაფიშვილი - ოპოზიციამ მიუტევებელი შეცდომა დაუშვა, როცა პლებისციტი თვითმმართველობის არჩევნებზე მიბმულ პროცენტში გაცვალა
საქართველოს ეროვნული უნივერსიტეტის და SEU DEVELOPMENT-ის ერთობლივი საჩუქარი SEU-ს სტუდენტს და ოლიმპიურ ჩემპიონს, ლაშა ბექაურს
ქართული ეროვნული მაუწყებლების მიერ ფასიანი ტრანზიტის მოთხოვნასთან დაკავშირებით საქართველოს საკაბელო ტელევიზიების კავშირი განცხადებას ავრცელებს
განახლებული ფორმატითა და მიზნებით - Setanta Sports-ი მაუწყებლობას 13 ქვეყანაში იწყებს
ჩაერთე სილქფესტის შეთავაზებებში და გაიაქტიურე დიდი მოცულობის ინტერნეტ და სასაუბრო პაკეტები
"ტანტა" და თერაპიის ცენტრი "გრადაცია" - Social Impact Award 2021-ის ფინალისტები ინკლუზიური მისიით