ბუტა რობაქიძე - ეს სახელი და გვარი ყოველთვის იქნება ჩვენი ცხოვრების, ისტორიის ნაწილი, - ამის შესახებ თბილისის საკრებულოს წევრმა, ჯაბა ჯიშკარიანმა, დიდუბის ეკლესიასთან, პატრულის მიერ მოკლული ბუტა რობაქიძის დაბადების დღესთან დაკავშირებით განაცხადა.

„თითოეული ჩვენგანის გულებში, ბუტა 19 წლის პატარა ბიჭად დარჩა, ბიჭად, რომელიც სისტემის მსხვერპლი გახდა და ჩაცხრილეს. ბიჭი, რომლის სახელსაც არაერთი სიბინძურე დააბრალეს. ბუტა რობაქიძე - ეს სახელი და გვარი ყოველთვის იქნება ჩვენი ნაწილი, ჩვენი ცხოვრების, ისტორიის ნაწილი. 19 წლის ბიჭი, რომელმაც დაგვანახა, რომ სისტემა კლავს, რომ სისტემა უმოწყალოა. სწორედ ბუტამ, სანდრომ, ზურამ, გიორგიმ - ამ ბიჭებმა მოახერხეს და ნიღაბი ჩამოხსნეს ხელისუფლებას და სწორედ მათ გააერთიანეს ქართველი ხალხი, სისტემის წინააღმდეგ“, - განაცხადა ჯაბა ჯიშკარიანმა.

შეგახსენებთ, რომ ამირან (ბუტა) რობაქიძე წერეთლის გამზირზე, დიდუბის ეკლესიასთან 2004 წლის 24 ნოემბერს მოკლეს.

აღნიშნულ ინფორმაციას თბილისის საკრებულო ავრცელებს.