საქველმოქმედო ფონდის დამფუძნებელმა ლეონიდ ჩერნოვეცკიმ მიიღო გადაწყვეტილება , მიმდინარე წლის 1-ელი ოქტომბრიდან დახუროს ფონდის მიერ ოპერირებული სამი საოჯახო ტიპის სახლი თბილისსა და ქობულეთში.
როგორც ,,ინტერპრესნიუსს’’ ,,ჩერნოვეცკის ფონდიდან’’ აცნობეს , ასეთი გადაწყვეტილების მიღების საბაბს წარმოადგენს საქართველოს ჯანდაცვის სამინისტროს უარყოფითი პოზიცია ფონდის თხოვნასთან დაკავშირებით, რომელიც ამ ტიპის ახალი სახლების გახსნის საკითხს ეხება. მათივე განმარტებით, ფონდის მიერ ჯანდაცვის მინისტრის სახელზე გაგზავნილ წერილში აღნიშნულია, რომ ჯანდაცვის სამინისტროს ამგვარი დამოკიდებულება საკითხისადმი ფონდის მიმართ უპატივცემულობას წარმოადგენს და წინააღმდეგობას უქმნის მის მუშაობას!
ფონდის დამფუძნებლის აზრით, „უარი საუბარზე მიუსაფარ ბავშვთა პრობლემებთან დაკავშირებით, ჯანდაცვის სამინისტროს მხრიდან უპასუხისმგებლო ნაბიჯს წარმოადგენს, რადგან ეს უმნიშვნელოვანესი ჰუმანიტარული პრობლემაა მთელი ქვეყნისთვის და არა მარტო ჩვენთვის’’.
მათივე ინფორმაციით, გამომდინარე იქიდან, რომ ჯანდაცვის სამინისტროს არ აქვს გადახდილი ბავშვებისათვის კუთვნილი თანხა და ფაქტობრივად, არსებული ლიცენზია უკვე ანულირებულია, ფონდის დამაარსებელი წყვეტს მათ დაფინანსებას, ხოლო, ფონდი ბავშვების მეურვეებისათვის გადაცემის პროცესს იწყებს.