ამერიკის თავდაცვის სამინისტრო იწყებს პროექტის რეალიზებას, რომელიც ფართომასშტაბიანი, ავტომატური გენერირებული საინფორმაციო შეტევების წინააღმდეგ ბრძოლას ითვალისწინებს. მისი დაწყება 2020 წლის 3 ნოემბერს დაგეგმილ ქვეყნის საპრეზიდენტო არჩევნების ფონზე იგეგმება. ამის შესახებ სააგენტო „ბლუმბერგი“ იუწყება.

პენტაგონი აპირებს, შეისყიდოს დანადგარები, რომელთა მეშვეობით შესაძლებელი იქნება „ფეიკების“ გამოვლენა ტექსტურ და აუდიოვიზუალურ ფორმატებში.

მოსალოდნელია, რომ ოთხი წლის განმავლობაში სისტემა იმუშავებს სატესტო რეჟიმში, ვიდრე ცალსახად დაიდება დასკვნა მისი ეფექტურობის შესახებ.

პენტაგონის გეგმებში შედის ალგორითმების ისეთი სრულყოფილი სისტემის შექმნაც, რომლითაც „ფეიკების“ მანამდე აღმოჩენა გახდება შესაძლებელი, ვიდრე ისინი სოციალურ ქსელებში უზარმაზარ პოპულარობას მიაღწევენ. ამგვარად, თავდაცვის სამინისტროს აღნიშნული სამმართველო გეგმავს, კონცენტრირება განახორციელოს დეტექტორების შექმნაზე, რომლებსაც გამოიყენებენ სემანტიკური შეუსაბამობების გამოსავლენად. თავად ტექნოლოგიას „SemaFor“-ს დაარქმევენ, რომელიც მომდინარეობს Semantic Forensics program-დან (სემანტიკური კრიმინალისტიკის პროგრამა).