გერმანელი სამართალდამცველები შეამოწმებენ, არის თუ არა ბერლინში საქართველოს მოქალაქის მკვლელობაში ეჭვმიტანილი პირი რუსეთის მოქალაქე. ამის შესახებ „რია ნოვოსტის“ გერმანიაში რუსეთის საელჩოში განუცხადეს.

დღეს ცნობილი გახდა, რომ რუსი დიპლომატები დაკავებულის თხოვნით, მას საპატიმროში შეხვდნენ და საკონსულო-სამართლებრივი დახმარება აღმოუჩინეს. საელჩოში სააგენტოს განუცხადეს, რომ „სპეკულაციებისა და გადაუმოწმებელი ინფორმაციის თავიდან ასაცილებლად, დაელოდონ გამოძიების დასრულებას“.

23 აგვისტოს ბერლინის პოლიციის ინფორმაციით, მოაბიტის რაიონში უცნობმა პირმა ზელიმხან ხანგოშვილი მოკლა. ბერლინის პროკურატურამ 24 აგვისტოს გაავრცელა განცხადება, რომ 40 წლის საქართველოს მოქალაქის მკვლელობაში ეჭვმიტანილი 49 წლის რუსეთის მოქალაქე დააკავეს.