ინდოეთის დედაქალაქ ნიუ-დელიში გაუდაბნოებასთან ბრძოლის კონვენციის მხარეთა მე-14 კონფერენცია მიმდინარეობს. კონფერენციაზე გარემოს დაცვისა და სოფლის მეურნეობის სამინისტროს დელეგაციამ გაეროს გარემოსდაცვითი პროგრამის პროექტი წარმოადგინა.

როგორც „ინტერპრესნიუსს“ გარემოს დაცვისა და სოფლის მეურნეობის სამინიტროდან აცნობეს, პროექტის ფარგლებში დედოფლისწყაროს მუნიციპალიტეტში, 21 ადგილობრივ ფერმერს მიწის მდგრადი მართვის შესახებ სწავლება ჩაუტარდათ. ამასთანავე, თესლბრუნვის დანერგვის მიზნით, ფერმერებს ბარდისა და წიწიბურას თესლები გადაეცათ და მათი უშუალოდ ველზე მოვლა-მოყვანისთვის კონსულტაციები გაეწიათ. შედეგად, უწყების ცნობით, სოკოვანი დაავადებები შემცირდა, ხოლო მომდევნო წელი უხვმოსავლიანი გახდა. ამასთან, სამინისტროს ინფორმაციით, გაიზარდა როგორც ხორბლის მოსავალი, ასევე ფერმერებმა ბარდის მოყვანითაც მიიღეს სარგებელი.

უწყების ინფორმაციით, მიწის მდგრადი მართვის საუკეთესო პრაქტიკის დანერგვისათვის, დედოფლისწყაროს მუნიციპალიტეტში განხორციელებული თესლბრუნვის საპილოტე პროექტი მსოფლიოს 6 საუკეთესო საპილოტე პროექტის სიაში მოხვდა.

საპილოტე პროექტი საქართველოს გარემოს დაცვისა და სოფლის მეურნეობის სამინისტროს მიერ, გლობალური გარემოსდაცვითი ფონდის დაფინანსებით დაიგეგმა და კავკასიის რეგიონული გარემოსდაცვითი ცენტრის პროექტის "სასოფლო ტერიტორიებზე მიწის მდგრადი მართვის დანერგვა მიწის დეგრადაციის შემცირების მიზნით" ფარგლებში განხორციელდა.

გაუდაბნოებასთან ბრძოლის კონვენციის მხარეთა მე-14 კონფერენციაზე წარდგენილ გაეროს გარემოსდაცვითი პროგრამის პროექტს, ინდოეთის პრემიერ მინისტრი და მსოფლიოს 120 ქვეყნის მთავრობის მაღალი რანგის წარმომადგენელი ესწრებოდნენ.