აშშ-ის ან საუდის არაბეთის მიერ ირანის წინააღმდეგ სამხედრო დარტყმის განხორციელება ტოტალურ ომს გამოიწვევს, - ამის შესახებ ირანის საგარეო საქმეთა მინისტრმა მუჰამედ ჯავად ზარიფმა CNN-თან ინტერვიუში განაცხადა.

„ჩვენ არ გვსურს ომი, არ გვსურს სამხედრო დაპირისპირებაში ჩართვა, მაგრამ ჩვენს ტერიტორიას უყოყმანოდ დავიცავთ,“ -აღნიშნა ზარიფმა.

კითხვაზე, თუ რა შედეგი ექნება ამერიკის, ან საუდის არაბეთის მიერ ირანის წინააღმდეგ სამხედრო დარტყმის განხორციელებას, საგარეო საქმეთა მინისტრმა უპასუხა: „ტოტალური ომი.“

მანამდე კი ზარიფმა სოციალურ ქსელ „ტვიტერში“ დაწერა, რომ „ბ-გუნდი, მათ შორის ისრაელის პრემიერ-მინისტრი ბენიამინ ნეთანიაჰუ და საუდის არაბეთის პრინცი მუჰამედ ბინ სალამნი, აშშ-ის პრეზიდენტს დონალდ ტრამპს ირანის წინააღმდეგ ომში იტყუებენ.“

მუჰამედ ჯავად ზარიფმა აღნიშნული განცხადებები მას შემდეგ გააკეთა, რაც აშშ-ის სახელმწიფო მდივანმა მაიკ პომპეომ განაცხადა, რომ შეერთებული შტატები, საუდის არაბეთსა და სპარსეთის ყურის სხვა მოკავშირეებთან ერთად, საუდის არაბეთის ნავთობტერმინალებზე განხორციელებული თავდასხმის საპასუხო ქმედებების მიზნით კოალიციის შექმნის საკითხს განიხილავდა.