ლევან ალაფიშვილი მიიჩნევს, რომ პრეზიდენტის მიერ სემეკის თავმჯდომარეობის კანდიდატის წარდგენა კანონდარღვევა არ არის

იურისტი ლევან ალაფიშვილი მიიჩნევს, რომ პარლამენტის მიერ სემეკის თავმჯდომარის არჩევა და პრეზიდენტის მიერ მთავრობასთან შეთანხმებით თავმჯდომარეობის კანდიდატის წარდგენა კანონდარღვევა არ არის. როგორც „ინტერპრესნიუსს“ ლევან ალაფიშვილმა განუცხადა, ენერგეტიკისა და წყალმომარაგების კომისიის თავმჯდომარის არჩევის წესი განსაზღვრულია, ელექტროენერგეტიკისა და ბუნებრივი გაზის შესახებ კანონით.

„ამ კანონის საფუძველზე შეიქმნა თავის დროზე სემეკი და ეს არის მისი ორგანიზაციული საქმიანობის სამართლებრივი საფუძველი. იმ კანონში წერია, წევრის და თავმჯდომარის განმწესების წესი. გარდა ამისა, პარლამენტის რეგლამენტშიცაა მითითება, როგორც წევრზე, ასევე თავმჯდომარეზე. შეიძლება ჩვენ მოსაზრებები გვქონდეს, რამდენად დამოუკიდებელია ან არ არის დამოუკიდებელი, მაგრამ იქიდან გამომდინარე, რომ კანონში წერია თავმჯდომარის არჩევის წესი, ეს საკითხი ვერ გახდება საეჭვო. თუკი დამოუკიდებლობის კონტექსტში ვიმსჯელებთ და შევადარებთ თუნდაც ეროვნულ ბანკს, მის შემთხვევაში მართლაც არის მექანიზმი, ვინაიდან ეროვნული ბანკის საბჭოს წევრები საკუთარი შემადგენლობიდან შეარჩევენ პრეზიდენტობის კანდიდატს და წარუდგენენ საქართველოს პრეზიდენტს. შემდეგ კი არის წარდგინების პროცედურა - ინტერაქცია პარლამენტსა და პრეზიდენტს შორის“, - განაცხადა ალაფიშვილმა.

იურისტი სამართლებრივ კაზუსად მიიჩნევს იმ ფაქტს, რომ კონსტიტუციით პრეზიდენტს მხოლოდ ეროვნული მარეგულირებელი ორგანოების წევრობის კანდიდატების წარდგენის უფლება აქვს, ორგანული კანონით კი ასევე აქვს უფლება თავმჯდომარეობის კანდიდატი წარუდგინოს პარლამენტს.

„ეს შეიძლება სამართლებრივი კაზუსია მაგრამ ამოხსნადია. თავმჯდომარე არის წევრი. ამასთან, თუ კონსტიტუციაში არ არის მითითებული, კანონით შეიძლება მიენიჭოს ესა თუ ის უფლებამოსილება პრეზიდენტს. შესაბამისად, წინააღმდეგობა როგორც ასეთი არ შეიძლება იყოს, რადგან კონსტიტუციაში მხოლოდ წევრი წერია. ეს შეიძლება საკამათო თემა იყოს, თუმცა საეჭვო ვერ გახდება, რომ ეს კანონისმიერი უფლებამოსილება და პროცედურა არ არის“, - განმარტა იურისტმა.

პარლამენტმა საქართველოს ენერგეტიკისა და წყალმომარაგების მარეგულირებელი ეროვნული კომისიის თავმჯდომარის თანამდებობაზე დავით ნარმანიას კანდიდატურის კენჭისყრა გადადო. კენჭისყრის გადადების მიზეზი საქართველოს პრეზიდენტის მიერ აღნიშნულ თანამდებობაზე ნარმანიას ნომინირების პროცედურა გახდა.

კენჭისყრა მას შემდეგ გადაიდო, რაც „ევროპული საქართველოს“ წევრმა ხათუნა გოგორიშვილმა განაცხადა, რომ საქართველოს პრეზიდენტს მხოლოდ სემეკ-ის წევრების წარდგენის უფლება აქვს და თუ პარლამენტი ნარმანიას კანდიდატურას კენჭს უყრიდა, ეს კონსტიტუციის დარღვევა იქნებოდა.

ალექსანდრე თვალჭრელიძე - ყველაზე უფრო საგულისხმოა, აშშ-ს ახლად დანიშნული ელჩის დუმილი, რაც იმაზე მიუთითებს, რომ ვაშინგტონი ყოყმანობს, რომელ პოლიტიკურ ძალაზე დადოს ფსონი
ქართული პრესის მიმოხილვა 18.02.2020
ხათუნა ბურკაძე - საქართველოს ნატო-ში ინტეგრაციის პროცესი დასაჩქარებელი და ბუქარესტის სამიტის თითქმის 12-წლიანი დაპირებები შესასრულებელია
ირაკლი გურჩიანი - ყოველი დღე განვითარების ახალი შესაძლებლობაა და ამის დასტური „ტოიოტას“ უახლესი მოდელებია
JTI საქართველოში ისევ საუკეთესო დამსაქმებელია
სამშენებლო პროექტი - იდეიდან უძრავ ქონებამდე
უპრეცედენტო შეთავაზება "სილქნეტისგან" - ახალი აბონენტები ინტერნეტისა და ტელევიზიის მაქსიმალურ პაკეტებს სპეციალურ ფასად გაიაქტიურებენ