ერაყში მიმდინარე ანტი-სამთავრობო საპროტესტო აქციებისას, უკანასკნელი 4 დღის განმავლობაში სულ მცირე 60 ადამიანი დაიღუპა, ასობით კი - დაშავდა, - ამის შესახებ ინფორმაციას „ბიბისი“ ქვეყნის უსაფრთხოებისა და სამედიცინო სამსახურებზე დაყრდნობით ავრცელებს.
გამოცემის ინფორმაციით, გარდაცვლილთა შორის 6 სამართალდამცავია.
აღსანიშნავია, რომ მსხვერპლის რაოდენობა ბოლო 24 საათის განმავლობაში გაორმაგდა, ვინაიდან დემონსტრანტებსა და პოლიციას შორის შეტაკებები გახშირდა.
საპროტესტო აქციები ერაყში სამშაბათს დაიწყო. დემონსტრანტები კორუფციას, უმუშევრობასა და ქვეყანაში არსებულ სოციალურ პირობებს აპროტესტებენ. არეულობის გამო, რამდენიმე ქალაქში კომენდანტის საათია გამოცხადებული. ამასთან, ხელისუფლებამ დედაქალაქთან დამაკავშირებელი რამდენიმე ავტომაგისტრალის გადაკეტვის გადაწყვეტილება მიიღო.