აშშ-სა და ფხენიანს შორის მოლაპარაკებები ჩაიშალა
აშშ-სა და ჩრდილოეთ კორეას შორის 5 ოქტომბერს შვედეთში განახლებული მოლაპარაკებები ჩაიშალა,-ამის შესახებ ინფორმაციას „როიტერსი“ ავრცელებს.
„აშშ-ს მოქნილი დამოკიდებულების, ახალი მეთოდისა და კრეატიული გამოსავლის პოვნის მოლოდინები გააჩინა, თუმცა იმედი გაგვიცრუა და ჩვენი ენთუზიაზმი ჩაახშო, ვინაიდან მოლაპარაკებების მაგიდაზე არაფერი დადო“, - განაცხადა ჩრდილოეთ კორეის მთავარმა მომლაპარაკებელმა კიმ მიონ გილიმ.
მისივე თქმით, როგორც აღმოჩნდა, ამერიკულ მხარეს ძველი პოზიცია და დამოკიდებულება არ შეუცვლია.
„მოლაპარაკებებმა ჩვენი მოლოდინები ვერ გაამართლა და საბოლოოდ შეწყდა“ ,- დასძინა მან.
აშშ-სა და ჩრდილოეთ კორეის დელეგაციების წარმომადგენლები ერთმანეთს სამუშაო შეხვედრის ფორმატში შვედეთში, კუნძულ ლიდინგეზე შეხვდნენ. მოლაპარაკებებს ქვეყნების ლიდერები დონალდ ტრამპი და კიმ ჩენ ინი არ ესწრებოდნენ.
