"ახალი საქართველოს" სოციალური მიმართულების ხელმძღვანელი თეონა ჭალიძე თბილისის მერს კახა კალაძეს საკრებულოს დეპუტატის ილია ჯიშკარიანის მხრიდან მისი თანამშრომლის თამთა თოდაძის მიმართ სავარაუდო ძალადობის ფაქტთან დაკავშირებით გაკეთებული განცხადების გამო აკრიტიკებს. თეონა ჭალიძე სოლიდარობას უცხადებს თამთა თოდაძეს, რომელიც ილია ჯიშკარიანს ძალადობაში ადანაშაულებს.

"სოლიდარობას ვუცხადებ თამთა თოდაძეს! თბილისის საკრებულოს დეპუტატის, ილია ჯიშკარიანის მიერ მისი თანაშემწის სავარაუდო სექსუალურ და ფიზიკური ძალადობის ფაქტზე რეაგირება უნდა იყოს უმკაცრესი. კანონი ყველასთვის უნდა კანონობდეს. საკმარისია, ოცნების ხელისუფლების მხრიდან შერჩევითი სამართალი.

მიუღებელია თბილისის მერის, კახა კალაძის უკბილო იუმორი ამ საკითხთან დაკავშირებით. მივმართავ ,,ქართული ოცნების" დეპუტატის გარემოცვას - ნუ ცდილობთ თამთა თოდაძის დაბულინგებას და ნუ კადრულობთ უკადრებელს. გახსოვდეთ, რომ ყველას გყავთ და, შვილი, მეუღლე. მეტად გაითავისეთ შექმნილი ვითარება. საგამოძიებო უწყებებს კი მოვუწოდებ დროული და სწრაფი რეაგირებისკენ, რაც სამწუხაროდ ჯერ არ ხდება", - აცხადებს თეონა ჭალიძე.