ევროკავშირი ბრიტანეთს მოუწოდებს შეწყვიტოს „სულელური დადანაშაულების თამაში“ „ბრექსითთან“ დაკავშირებით. ევროკავშირმა ეს მოწოდება მას შემდეგ გააკეთა, რაც წყარომ „როიტერსს“ აცნობა, რომ გერმანიის კანცლერის, ანგელა მერკელის „მიუღებელი მოთხოვნების“ გამო, შეთანხმება ფაქტობრივად შეუძლებელია.

„როიტერსის“ ინფორმაციით, 23 დღით ადრე, ვიდრე გაერთიანებული სამეფო ბლოკს დატოვებს, „ბრექსითის“ ბედი კვლავ გაურკვეველია. ლონდონი და ბრიუსელი შეთანხმების გაჭიანურებაში ერთმანეთს ადანაშაულებენ.

ბრიტანეთის მთავრობის სახლიდან წყარო აცხადებს, რომ იმ შემთხვევაში, თუ მერკელის მოსაზრება ჩრდილოეთ ირლანდიასთან დაკავშირებით, რომ ის დარჩეს ევროკავშირის საბაჟო კავშირში, სრულიად ევროკავშირის პოზიციაა, მაშინ, შეთანხმება ვერ შედგება.

„თუ მართლაც ასეა და ეს ევროკავშირის ახალი პოზიციაა, მაშინ ეს ნიშნავს, რომ შეთანხმება ვერც ახლა და ვერც ვერასდროს ვერ შედგება“, - აცხადებს წყარო.

შეგახსენებთ, ცოტა ხნის წინ, გერმანიის კანცლერ ანგელა მერკელსა და ბრიტანეთის პრემიერ ბორის ჯონსონს შორის სატელეფონო საუბარი შედგა, სადაც წყაროს ცნობით, გერმანიის კანცლერმა "ბრექსითის" „წარმოუდგენელი პირობები“ წამოაყენა.