საკრებულოს თანამშრომლის, თამთა თოდაძის ადვოკატი, თამარ ლუკავა გამომძიებლებისა და საპატრულო პოლიციის თანამშრომლების დაკითხვის მოთხოვნით დღეს დღის მეორე ნახევარში პროკურატურას მიმართავს.

როგორც „ინტერპრესნიუსს“ ლუკავამ განუცხადა, დაზარალებულის დაცვა დამატებით საგამოძიებო მოქმედებებს ითხოვს და გამოძიებამ აუცილებლად უნდა დაკითხოს ის პოლიციელები, რომლებიც ინციდენტის შემდეგ, ილია ჯიშკარიანის ოფისში პირველად მივიდნენ.

„რამდენიმე შუამდგომლობით უკვე მივმართეთ პროკურატურას, მაგალითად, თამთა თოდაძის ტელეფონთან დაკავშირებით, რომელიც ამ დრომდე დაკარგულია. პასუხი ჯერ არ მიგვიღია. ასევე, სამშაბათს მივმართავთ შუამდგომლობით პროკურატურას, რომ დაკითხონ ის გამომძიებლები და საპატრულო პოლიციის თანამშრომლები, რომლებიც ადგილზე იმყოფებოდნენ. ნაწილი უკვე გამოკითხულია, თუმცა ზუსტ რაოდენობას ვერ გეტყვით. გამომძიებლები, პოლიციის უფროსი და მოადგილე ადგილზე იმყოფებოდნენ და გვსურს, ვინც უშუალოდ იყო შემთხვევის ადგილზე, ყველა გამოიკითხოს. ძალიან ბევრი პირია გამოსაკითხი. თვითონ თოდაძესაც არ ახსოვს ზუსტი რაოდენობა. თუმცა, ადგილზე იმყოფებოდა საპატრულო პოლიციის ეკიპაჟი, კრიმინალური პოლიცია, პოლიციის უფროსი და ძალიან ბევრი პირი“, - განაცხადა ლუკავამ.

ცნობისთვის, თამთა თოდაძის მიმართ განხორციელებული სექსუალური ხასიათის ქმედებისა და ცემის ფაქტზე ბრალი თბილისის საკრებულოს დეპუტატს, ილია ჯიშკარიანს აქვს წარდგენილი. მას აღკვეთის ღონისძიების სახით 10 000-ლარიანი გირაო აქვს შეფარდებული. თოდაძე პროკურატურას დაზარალებულად ჰყავს ცნობილი.

იხილეთ ვიდეო: თამთა თოდაძის ადვოკატი საპატრულო პოლიციის თანამშრომლების დაკითხვის მოთხოვნით პროკურატურას მიმართავს