შინაგან საქმეთა მინისტრის მოადგილე, ნინო ჯავახაძე ნიდერლანდების სამეფოს საელჩოს დაფინანსებული პროექტის მმართველი საბჭოს წევრებს შეხვდა. „პოლიციასა და საზოგადოებას შორის ნდობის გამყარება“ - ამ სახელწოდებით პროექტს შინაგან საქმეთა სამინისტროსთან ერთად ორგანიზაცია "საქართველოს სტრატეგიის და განვითარების ცენტრი" ახორციელებს.

როგორც „ინტერპრესნიუსს“ შინაგან საქმეთა სამინისტროდან აცნობეს, შეხვედრაში მონაწილეობა პროექტის განხორციელების პროცესში ჩართულმა , შინაგან საქმეთა სამინისტროს შესაბამისი დეპარტამენტების და "საქართველოს სტრატეგიის და განვითარების ცენტრი" წარმომადგენლებმა მიიღეს. მათ განხორციელებული აქტივობები შეაჯამეს და სამომავლო პრიორიტეტული მიმართულებები განსაზღვრეს.

მათივე ცნობით, პროექტის მიზანი მოსახლეობასა და პოლიციას შორის თანამშრომლობის გაღრმავება და მართლწესრიგის ოფიცრის ინსტიტუტის შესახებ საზოგადოების ცნობიერების ამაღლებაა.

პროექტი მიმდინარე წლის მარტში დაიწყო და მის ფარგლებში განხორციელდა:

ვიზიტები სკოლებსა და უნივერსიტეტებში, სოციალური აქტივობები, საზოგადოებრივი აზრის კვლევა, ასევე შემუშავდა მართლწესრიგის ოფიცრის ინსტიტუტის კომუნიკაციის სტრატეგია.