აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი რუსლან აბაშიძე საქართველოში გერმანიის ფედერაციული რესპუბლიკის საგანგებო და სრულუფლებიან ელჩ ჰუბერტ ქნირშს შეხვდა. შეხვედრა გაცნობით ხასიათს ატარებდა.
მთავრობის თავმჯდომარემ გერმანელ დიპლომატს აფხაზეთის ავტონომიური რესპუბლიკის მთავრობის საქმიანობისა და აქტივობების შესახებ მიაწოდა ინფორმაცია.
ამასთან, როგორც „ინტერპრესნიუსს“ აფხაზეთის ავტონომიური რესპუბლიკის მთავრობიდან აცნობეს, შეხვედრაზე ისაუბრეს ოკუპირებულ აფხაზეთში არსებულ სიტუაციაზე, მათ შორის, მძიმე სოციალ-ეკონომიკურ ვითარებასა და ადამიანის უფლებების დარღვევის ფაქტებზე.
ასევე, საუბარი შეეხო აფხაზეთის ავტონომიური რესპუბლიკის მთავრობისა და გერმანიის ფედერაციული რესპუბლიკის საელჩოს შესაძლო თანამშრომლობას სხვადასხვა სფეროში.
შეხვედრას აფხაზეთის ავტონომიური რესპუბლიკის მთავრობის თავმჯდომარის მრჩეველი ლევან გერაძე და აფხაზეთის ავტონომიური რესპუბლიკის მთავრობის აპარატის საერთაშორისო ურთიერთობათა, ანალიტიკისა და პროტოკოლის დეპარტამენტის უფროსი დავით გახარია ესწრებოდნენ.
