თსუ-ში კავკასიოლოგთა V საერთაშორისო კონგრესი გაიხსნება
ივანე ჯავახიშვილის სახელობის თბილისის სახელმწიფო უნივერსიტეტში, თსუ-ს ჰუმანიტარულ მეცნიერებათა ფაკულტეტის კავკასიოლოგიის ინსტიტუტი და არნოლდ ჩიქობავას სახელობის ენათმეცნიერების ინსტიტუტის ორგანიზებით, ხვალ კავკასიოლოგთა V საერთაშორისო კონგრესი გაიხსნება.
თსუ-ს პრესსამსახურის ინფორმაციით, კონგრესის თემააა „საქართველო კავკასიის კულტურულ-ცივილიზაციურ კონტექსტში (ისტორია, თანამედროვეობა და პერსპექტივები)“.
მათივე ცნობით, კონგრესის მიზანია, გამოკვეთოს საქართველოს როლი კავკასიის რეგიონის კულტურულ-ცივილიზაციური კონტექსტის ისტორიულ ჭრილში, განსაზღვროს კავკასიის რეგიონის წინაშე არსებული ჰუმანიტარულ-ეკოლოგიური, პოლიტიკური და ეკონომიკური გამოწვევები, შეიმუშაოს გამოწვევათა გადასაჭრელად გასატარებელი აქტივობების სამეცნიერო საფუძვლები, გამოკვეთოს კავკასიის ინტეგრაციის პერსპექტივა რეგიონალიზაციისა და გლობალიზაციის კონტექსტში. ამასთან, განსაზღვროს კავკასიის ლინგვოკულტურული და ბიომრავალფეროვნების შენარჩუნების შესაძლებლობები.
ცნობისთვის, კონგრესი რეგულარულად იმართება სამ წელიწადში ერთხელ საქართველოში და თსუ არის მისი ორგანიზატორი.
კონგრესში მონაწილეობენ მეცნიერი-კავკასიოლოგები საერთაშორისო კავკასიოლოგიური ცენტრებიდან, მათ შორის, აღსანიშნავია, კონგრესში ჩრდილოკავკასიელი მეცნიერების მონაწილეობა.
v-if="article.gallery" v-html="article.gallery"
