უმრავლესობის წევრები იკრიბებიან სამსჯელოდ და არა ვინმეს დასატუქსად, - ასე ეხმიანება იურიდიულ საკითხთა კომიტეტის თავმჯდომარე ანრი ოხანაშვილი კაჭრეთში ბიძინა ივანიშვილისა და პარტიის თბილისის რაიონული ორგანიზაციების წარმომადგენელთა შეხვედრას, რომელსაც უმრავლესობის წევრებიც ესწრებოდნენ. გავრცელებულ ინფორმაციას იმის შესახებ, რომ ბიძინა ივანიშვილმა კონკრეტული პირები დატუქსა, დეპუტატი ხუმრობას უწოდებს.

„თქვენც გაიგეთ? კარგია ხუმრობა საღამოს მითუმეტეს დაღლის ფონზე. უმრავლესობის წევრები იკრიბებიან ხოლმე არა ვინმეს დასატუქსად, არამედ კონკრეტულ საკითხებზე სამსჯელოდ. ჩვენი ინტერესია საზოგადოების გამოწვევებზე მსჯელობა და მათ შორის, ეს შეხვედრებიც ემსახურება იმას, რომ მაქსიმალურად ახლო კონტაქტი გვქონდეს საზოგადოებასთან, ამომრჩევლებთან. ეს შეხვედრები არის საქმეზე ორიენტირებული იმისთვის, რომ უფრო მეტად ვიშრომოთ ჩვენი საზოგადოების და არა ვინმეს დატუქსვისთვის. ასე, რომ ეს დავტოვოთ ხუმრობად",- განაცხადა ანრი ოხანაშვილმა.