ოპოზიციური პარტიებისა და სამოქალაქო მოძრაობების წარმომადგენლები დღეს, 28 ნოემბერს, 08:30 საათიდან პარლამენტთან შეიკრიბებიან და საკანონმდებლო ორგანოს პიკეტირებას შეეცდებიან. ამის შესახებ „ინტერპრესნიუსს“ ოპოზიციური პარტიების წარმომადგენლებმა აცნობეს.

კერძოდ, "ნაციონალური მოძრაობა" და მათი მხარდამჭერები 08:30 საათიდან ჩიტაძის ქუჩაზე - საგარეო საქმეთა სამინისტროსთან აპირებენ შეკრებას, "ევროპული საქართველო" და მათი მხარდამჭერები კი პარლამენტის წინ.

28 ნოემბერს, პარლამენტში 10:00 საათიდან კომიტეტის სხდომებია ჩანიშნული, 12:00 საათზე კი პლენარული სხდომა.

შეგახსენებთ, რომ ოპოზიციური პარტიებმა და სამოქალაქო მოძრაობებმა პერმანენტული აქციები მას შემდეგ დაიწყეს, რაც პროპორციულ საარჩევნო სისტემაზე გადასვლასთან დაკავშირებული კანონპროექტი ჩავარდა. მათი მოთხოვნა ვადამდელი პროპორციული არჩევნების ჩატარებაა.