თუ გადავერთვებით მარტო "კმარას" დღის რეჟიმზე, ეს ქვეყანაზე აისახება და შემდეგ არავინ მოიგონებს იმას, რკინის კედელი იდგა თუ გიგა ბოქლომ ბოკერიას მიჰყავდა შეტევაზე ხალხი,- ამის შესახებ პარლამენტის ვიცე-სპიკერმა გია ვოლსკიმ ჟურნალისტებთან განაცხადა, რითაც ის პარლამენტთან დღეს გამართულ აქციას გამოეხმაურა.

მისივე თქმით, შექმნილი ვითარება სასიამოვნო არ არის, თუმცა, პარლამენტის საქმიანობის შეჩერება და მნიშვნელოვანი საკითხების ჩაგდება არ გამოვა.

"არ გამოვა, პარლამენტმა საქმიანობა გააჩეროს და არ იმსჯელოს იმ უმნიშვნელოვანეს საკითხებზე როგორიც არის მიწის თემა, მისი დარეგისტრირება, სოფლის მეურნეობის პროექტების წამოწევის თემა და ქვეყნის გადარჩენა და სწორ გზაზე გაყვანა", - აცხადებს გია ვოლსკი.