თავდაცვის ყოფილი მინისტრის, ბრალდებული ირაკლი ოქრუაშვილის მიმართ შეფარდებული აღკვეთის ღონისძიება პატიმრობა გადაისინჯა და ძალაში დარჩა. აღნიშნული გადაწყვეტილება მოსამართლე ლავრენტი მაღლაკელიძემ გამოაცხადა.

როგორც საქმის პროკურორმა გიორგი მუკბანიანმა სასამართლო პროცესზე განაცხადა, საქმეში ახალი არსებითი გარემოება არ გამოვლენილა, რის გამოც, აღკვეთის ღონისძიება პატიმრობა ძალაში უნდა დარჩენილიყო.

ირაკლი ოქრუაშვილის მიმართ შეფარდებული პატიმრობის ძალაში დატოვების შუამდგომლობას დაცვის მხარე არ დაეთანხმა. ოქრუაშვილის ადვოკატის, სულხან კომახიძის განცხადებით, მისი დაცვის ქვეშ მყოფის მხრიდან არც ახალი დანაშაულის ჩადენის, არც მიმალვის საფრთხე არ არსებობობს.

შემდეგი სასამართლო სხდომა 6 დეკემბერს, 14:00 საათზე გაიმართება.

ირაკლი ოქრუაშვილი 20 ივნისის აქციის დარბევისას სისხლის სამართლის კოდექსის 225-ე მუხლით გათვალისწინებული დანაშაულისთვის დააკავეს, რაც ჯგუფური ძალადობის ორგანიზებას, ხელმძღვანელობას და მასში მონაწილეობას გულისხმობს.