ჩინეთის მისია ჟენევაში გაეროს ადამიანის უფლებათა უმაღლეს კომისარს მიშელ ბაშელეს ჰონგ-კონგში „რადიკალური ძალადობის“ წახალისებაში ადანაშაულებს, - ამის შესახებ ინფორმაციას „დოიჩე ველე“ ავრცელებს.
გამოცემის ცნობით, საქმე ეხება South China Morning Post-ში გამოქვეყნებულ სტატიას, სადაც მიშელ ბაშელე წერს, რომ ჰონგ-კონგის ხელისუფლებამ საზოგადოებასთან „ფართო, ღია და ინკლუზიური დიალოგი უნდა აწარმოოს.“ ასევე, გაეროს ადამიანის უფლებათა უმაღლესი კომისარი ჰონგ-კონგის ლიდერს, კერი ლამს, მოუწოდებს, რომ „დამოუკიდებელი და მიუკერძოებელი გამოძიების“ ჩატარება უზრუნველყოს.
ჩინეთის მისია ჟენევაში აცხადებს, რომ მიშელ ბაშელეს სტატია ჩინეთის საშინაო საქმეებში ჩარევა და ჰონგ-კონგის ხელისუფლებასა და პოლიციაზე ზეწოლის მოხდენის მცდელობაა, რომელიც „რადიკალური ძალადობის“ კიდევ უფრო გაძლიერებას უწყობს ხელს.