ფაქტია, რომ ვენეციის კომისია შეცვალეს კრემლით, რათა მასთან შეათანხმონ, როგორც "ნაციონალური მოძრაობის“ ე.წ. პროექტი, ასევე მათი სამოქმედო გეგმები, - ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა ჟურნალისტებს განუცხადა, რითაც გამოეხმაურა ნინო ბურჯანაძის მოსკოვში ვიზიტს.

მისი თქმით, ოპოზიცია, რომელიც მოლაპარაკების მაგიდასთან ზის, ნინო ბურჯანაძის ოკუპანტ ქვეყანაში ვიზიტს ამართლებს.

„თქვენ ნახეთ გავრილოვის შემთხვევაში რა განცხადებები კეთდებოდა და წარმოიდგინეთ, რომ იმ ადამიანების ერთ-ერთი წარმომადგენელი, რომლებიც მოლაპარაკების მაგიდასთან სხედან, კრემლში გაემგზავრა შეხვედრებისთვის. შეხედეთ მათ განცხადებებს, როგორ ამართლებენ და როგორი მხარდამჭერები არიან ოკუპანტი ქვეყნის. რაზე უნდა იმსჯელონ ოკუპანტი ქვეყნის წარმომადგენლებთან კრემლში? ხედავთ, როგორი არათანმიმდევრულები არიან და როგორ ამართლებენ მის ამ ქმედებას?! კი არ ცდილობენ, არამედ ამართლებენ ნინო ბურჯანაძეს. ფაქტია, რომ ვენეციის კომისია შეცვალეს კრემლით, რათა მასთან შეათანხმონ, როგორც "ნაციონალური მოძრაობის“ ე.წ. პროექტი, ასევე მათი სამოქმედო გეგმები. მათ ყველა ქმედებაში იკვეთება მათი რეალური მიზანი - ხელისუფლების დამხობა,” - განაცხადა ოხანაშვილმა.