გენადი არველაძე - აუცილებელია ხელი შევუწყოთ ქართველ და ფრანგ მეწარმეებს, უკეთ გაიცნონ ერთმანეთის შესაძლებლობები

„საფრანგეთი საქართველოს მნიშვნელოვანი პოლიტიკური და სავაჭრო-ეკონომიკური პარტნიორი ქვეყანაა, რომელიც ხელს უწყობს ჩვენი ქვეყნის ინტეგრაციას ევროპულ და ევროატლანტიკურ სტრუქტურებში“, - ამის შესახებ ეკონომიკისა და მდგრადი განვითარების მინისტრის მოადგილე გენადი არველაძემ MEDEF International - ში საფრანგეთ-საქართველოს ბიზნესსაბჭოს სესიაზე გამოსვლისას, რომელიც „დიმიტრი ამილახვარის სახელობის ქართულ - ფრანგული დიალოგის“ ფარგლებში გაიმართა.

„დიმიტრი ამილახვარის სახელობის ქართულ - ფრანგული დიალოგის ფარგლებში, ჩვენ ვითანამშრომლებთ ოთხი პრიორიტეტული მიმართულებით, რომელთა შორისაც ვაჭრობა და ეკონომიკაა. ამდენად, ამ დიალოგის ფარგლებში გამართულ ბიზნესსაბჭოზე განვიხილეთ მნიშვნელოვანი საკითხები, რომლებიც შეეხება არა მხოლოდ ორმხრივ ვაჭრობას, არამედ ინვესტიციების მოცულობის ზრდას, თანამშრომლობას ტრანსპორტის, ენერგეტიკის, ტურიზმის, ტურისტული ინფრასტრუქტურის მშენებლობის, გადამამუშავებელი მრეწველობის და სხვა სექტორებში,“ – განაცხადა არველაძემ.

სიტყვით გამოსვლისას, ეკონომიკისა და მდგრადი განვითარების მინისტრის მოადგილემ გენადი არველაძემ საბჭოს წევრებს საქართველოს ეკონომიკური ტენდენციები, მიმდინარე და დაგეგმილი რეფორმები, აგრეთვე ევროპასთან ასოცირების შეთანხმებით ნაკისრი ვალდებულებების შესრულების დინამიკა გააცნო.

მისი თქმით, საქართველო აქტიურად ახორციელებს ევროპასთან საკანონმდებლო ბაზის ჰარმონიზაციას, მათ შორის, მთელ რიგ სამრეწველო პროდუქციაზე ტექნიკური რეგლამენტების შემოღების შესახებ.

„ხარისხიან ქართულ პროდუქციას საფრანგეთში ნაკლებად იცნობენ. თქვენთან თანამშრომლობით გვინდა, უფრო ინტენსიური გავხადოთ ჩვენი მონაწილეობა სავაჭრო მისიებში, გამოფენებსა და ბიზნეს ფორუმების ორგანიზებაში. აუცილებელია ხელი შევუწყოთ ჩვენს მეწარმეებს, უკეთ გაიცნონ ერთმანეთის შესაძლებლობები და აწარმოონ უფრო წარმატებული დიალოგი, რაც, საბოლოო ჯამში, გაზრდის ინვესტიციას, შექმნის ახალ სამუშაო ადგილებს და დადებითად აისახება ქვეყნის ეკონომიკურ სიძლიერეზე“ - განაცხადა ეკონომიკისა და მდგრადი განვითარების მინისტრის მოადგილემ.

გენადი არველაძემ განსაკუთრებულად გაამახვილა ყურადღება ფრანგულ მხარესთან ნაყოფიერ თანამშრომლობაზე საქართველოს მთის კურორტების განვითარების მიმართულებით. მისი თქმით, საფრანგეთს, როგორც მსოფლიოში წამყვან სამთო - სათხილამურო კურორტების მქონე ქვეყანას შეუძლია დიდი გამოცდილება გაუზიაროს საქართველოს, რომელსაც აქვს დიდი ამბიცია და შესაძლებლობა, განავითაროს სამთო საკურორტო ზონები ქვეყანაში და მოიზიდოს როგორც ადგილობრივი, ასევე საერთაშორისო ტურისტები.

შეხვედრაზე ასევე ისაუბრეს ბაკურიანში 2023 წელს დაგეგმილი თავისუფალ სრიალსა და სნოუბორდში მსოფლიო ჩემპიონატის მოსამზადებელი სამუშაოების შესახებ, რომლის ფარგლებშიც დაგეგმილია არაერთი ინფრასტრუქტურული პროექტის განხორციელება. ასევე გამოიკვეთა სოფლის მეურნეობის, ფარმაციის, ტურიზმისა და საქართველოს მთის კურორტების განვითარების პროცესში ფრანგული კომპანიების დაინტერესება.

ქართულმა მხარემ დაინტერესებულ ფრანგულ კომპანიებს დეტალური ინფორმაცია მიაწოდა წყალტუბოს საკურორტო ზონის პოტენციალისა და დაგეგმილი ინფრასტრუქტურული პროექტების შესახებ.

შეხვედრაში ასევე მონაწილეობდნენ გარემოს დაცვისა და სოფლის მეურნეობის მინისტრის მოადგილე ხატია წილოსანი, ეკონომიკისა და მდგრადი განვითარების სამინისტროს სსიპ სააგენტო „აწარმოე საქართველოში“ ხელმძღვანელი მიხეილ ხიდურელი, თბილისის მერის მოადგილე მაია ბითაძე და სხვა ოფიციალური პირები.

ვიზიტის ფარგლებში, საქართველოს ეკონომიკისა და მდგრადი განვითარების მინისტრის მოადგილემ გენადი არველაძემ ასევე სამუშაო შეხვედრა გამართა საფრანგეთის ეკონომიკის სამინისტროს, სახაზინო და ეკონომიკური პოლიტიკის გენერალური დირექტორატის, ორმხრივი ეკონომიკური ურთიერთობების დეპარტამენტის უფროსის მოადგილე კრისტოფ ბორთან, რომელთანაც ორმხრივი სავაჭრო-ეკონომიკური ურთიერთობების განვითარებაზე ისაუბრა.

აღნიშნულ ინფორმაციას ეკონომიკისა და მდგრადი განვითარების სამინისტრო ავრცელებს.

ალექსეი მალაშენკო - ვინც არ უნდა მოიგოს საქართველოს არჩევნებში, აფხაზეთისა და სამხრეთ ოსეთის საკითხებში არაფერი შეიცვლება, ამიტომ, კრემლისთვის პრინციპული მნიშვნელობა არ აქვს, ვინ გაიმარჯვებს
ქართული პრესის მიმოხილვა 10.07.2020
ზაალ ანჯაფარიძე - შაქარაშვილის საქმესთან დაკავშირებით კითხვები უფრო მეტია, ვიდრე პასუხები, რაც გამოწვეულია რამდენიმე გარემოებით
სუბსიდირებული იპოთეკური სესხი - ახალი შესაძლებლობა ტერაბანკისგან
სილქნეტის მობილური აბონენტები თიბისის მობაილბანკით სარგებლობას ინტერნეტის დახარჯვის გარეშე შეძლებენ
დეველოპერული კომპანია "ბლოქსი" მომხმარებლებს ბინებზე გრანდიოზულ ფასდაკლებას სთავაზობს
სადაზღვევო კომპანია "ბენეფიტსი" მცირე და საშუალო ბიზნესკომპანიებს სპეციალურ პირობებს სთავაზობს
FDA-იმ IQOS-თან დაკავშირებით გადაწყვეტილება მიიღო და კომპანიის მარკეტინგის უფლება მისცა  (R)