საფრანგეთის შინაგან საქმეთა მინისტრმა კრისტოფ კასტანერიმ განაცხადა, რომ სიძულვილის მოტივით ჩადენილ დანაშაულებთან საბრძოლველად სპეციალური სამსახურის გახსნა იგეგმება, - ამის შესახებ ინფორმაციას „დოიჩე ველე“ ავრცელებს.

გამოცემის ცნობით, კრისტოფ კასტანერის ინიციატივა ქვეყანაში ბოლო დროს გახშირებულ ანტი-სემიტურ ინციდენტებს უკავშირდება.

„ჩვენს ეროვნულ ტერიტორიაზე სიძულვილი მძვინვარებს, ყველაფერს გავაკეთებთ, რომ ის ადამიანები, ვინც ამას აკეთებენ, სათანადოდ დაისაჯონ,“- განაცხადა კრისტოფ კასტანერიმ.

შეგახსენებთ, ორი დღის წინ ქალაქ ვესტჰოფენში მდებარე ებრაელების 100-ზე მეტი საფლავი სვასტიკებითა და ანტისემიტური ლოზუნგებით მოხატეს.

სტატისტიკის თანახმად, 2018 წელს ანტი-სემიტური ინციდენტების რაოდენობა წინა წელთან შედარებით 74 პროცენტით გაიზარდა.