ხელისუფლებამ პრაქტიკულად გამოაცხადა მზადყოფნა, რომ უკან დახევის გეგმას განიხილავს, - ამის შესახებ „გამარჯვებული საქართველოს“ ერთ-ერთმა ლიდერმა კოტე კემულარიამ განაცხადა.

„შეგვიძლია ვთქვათ, რომ ორი ნაწილისგან შედგებოდა ჩვენი მოთხოვნა მაჟორიტარული და პროპორციული, როგორც კონსტიტუციაში გვაქვს ანუ 50%-ით ამ ხელისუფლებამ პრაქტიკულად გამოაცხადა მზადყოფნა, რომ განიხილავს უკან დახევის გეგმას. არ ვიცით ეს ჯერ როგორ განვითარდება, ან მათ სიტყვას რა ფასი აქვს, ჩვენ ვიცით. მაგრამ ფაქტია, რომ კარის გახსნა მოხდა, ჩვენ ვიხილეთ მათი სახეები და ძალიან დიდი მადლობა ამისთვის საერთაშორისო თანამეგობრობას, დიპლომატებს, სწორედ მათი დამსახურებაა, რომ ესენი როგორც იქნა მიხვდნენ, რომ „არა, არას“ ძახილი მათ საბოლოოდ მოჭრიდა თავს მთელ მსოფლიოში“, - განაცხადა კოტე კემულარიამ.

კემულარიას თქმით, სასაცილოა მმართველი პარტიის კატეგორიულობა და შემდეგ უკან დახევა.

„ძალიან სასაცილოა ამ ფიტულების ასეთი კატეგორიულობა, მერე უკან დახევა და სახეების მიღება, რომ იცით რა, ნახევარი ყოფილა კონსტიტუციური, ხვალ ილაპარაკებენ რომ 67% ყოფილა კონსტიტუციური, ბოლოს ვნახავთ ამათ იატაკზე დაცემულებსაც პოლიტიკური თვალსაზრისით“, - განაცხადა კოტე კემულარიამ.

კემულარიას განცხადებით, დღეს მთელმა მსოფლიომ მოისმინა, რომ ხელისუფლებას პოლიტპატიმრების გათავისუფლება მოსთხოვეს.

„რაც შეეხება მეორე ნაწილს, სადაც ჩვენ ვსაუბრობდით პოლიტპატიმრებზე, დღეს ყველამ და მთელმა მსოფლიომ მოისმინა, რომ მათ პირდაპირ უთხრეს ხელისუფლებას, რომ გაათავისუფლეთ პოლიტპატიმრები. 21-ე საუკუნეა, კანონის უზენაესობისკენ მიდის დემოკრატიული სამყარო და ეს სირცხვილია. ანუ „სირცხვილის კორიდორი“ მოუწყვეს ფაქტობრივად მათ მაღალი რანგის დიპლომატებმა. ასე რომ ჩვენ შეგვიძლია მესამე რაუნდის დროს ვიხილოთ ხელისუფლება, რომელსაც უწევს უკან დახევა და უწევს დათმობაზე ფიქრი“, - განაცხადა კოტე კემულარიამ.

მისი თქმით, ისინი ყველა შემთხვევაში მზად არიან მშვიდობიანი საპროტესტო აქციების გასაგრძელებლად.