დარწმუნებული ვარ, ქალბატონ სალომეს არ უნდოდა იმის თქმა, რაც მან თქვა, - ასე გამოეხმაურა ვიცე-პრემიერი, რეგიონული განვითარებისა და ინფრასტრუქტურის მინისტრი მაია ცქიტიშვილი საქართველოს პრეზიდენტის, სალომე ზურაბიშვილის განცხადებას ჯართან დაკავშირებით.
მინისტრის თქმით, რა თქმა უნდა, სასურველია, რომ პრეზიდენტის განცხადებაში არ ყოფილიყო ინტერპრეტაციის საფუძველი.
„ბუნებრივია, ჯარიც გვყავს, შესაბამისი იარაღი და აღჭურვაც აქვს ამ ჯარს. ჩვენს ჯარში ჩვენი ქვეყნის ყველაზე ღირსეული წარმომადგენლები მსახურობენ. პრეზიდენტის ადმინისტრაციამ გააკეთა განმარტება კონტექსტთან დაკავშირებით. ქალბატონ სალომეს ნამდვილად არ უნდოდა ქართული ჯარის შეურაცხყოფა“, - აცხადებს ცქიტიშვილი.
ცნობისთვის, საქართველოს პრეზიდენტის განცხადებით, „ჩვენ არც ჯარი გვაქვს, არც იარაღი და არც გვექნება, არც ის დიდი ეკონომიკური პოტენციალი გვაქვს, რომ რეგიონი დავიპყროთ, მაგრამ ჩვენ გვაქვს ის ძლიერი იარაღი, რასაც ჰქვია ცოდნა, მეცნიერება, კულტურა“.