პარლამენტის თავმჯდომარის, არჩილ თალაკვაძის განცხადებით, ოპოზიციასთან დღევანდელ შეხვედრაზე მრავალმანდატიან ოლქებთან დაკავშირებით წინა შეხვედრაზე გამოთქმული მოსაზრება განიხილება, რომელიც თალაკვაძის შეფასებით, კონსტიტუციასთან წინააღმდეგობაში არ არის.

როგორც პარლამენტის თავმჯდომარემ “ქართულ ოცნებასა” და ოპოზიციას შორის შეხვედრამდე განაცხადა, მმართველი გუნდი აღნიშნულ საკითხზე ოპოზიციის წარმომადგენლებს საკუთარ არგუმენტებს გააცნობს.

“წინა პოლიტიკური კონსულტაციების დროს გამოითქვა მოსაზრება მრავალმანდატიან ოლქებთან დაკავშირებით, რომელიც არსებული შერეული სისტემის ფარგლებში განიხილება. ეს არ მოდის წინააღმდეგობაში არსებულ კონსტიტუციასთან, შესაბამისად, ჩვენ ვთქვით, რომ განვიხილავთ მომდევნო პოლიტიკური კონსულტაციების ფარგლებში ამის შესაძლებლობას. ჩვენი შეხვედრის ძირითადი დრო დაეთმობა სწორედ ამას, რომ არგუმენტები გავცვალოთ მრავალმანდატიანი ოლქებთან დაკავშირებით, თუ რა შეთანხმება შეიძლება იყოს მიღწეული და როგორ გაგრძელდება დიალოგი, ამას ვნახავთ შეხვედრის შემდეგ. ჩვენ გვაქვს ჩვენი არგუმენტები და ამ არგუმენტებს გავაცნობთ მხარეებს”, - განაცხადა თალაკვაძემ.