მიხეილ ჩხენკელმა იაკობ გოგებაშვილის სახელობის თელავის სახელმწიფო უნივერსიტეტს 80 წლის იუბილე მიულოცა

საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა იაკობ გოგებაშვილის სახელობის თელავის სახელმწიფო უნივერსიტეტის 80 წლის იუბილესადმი მიძღვნილ ღონისძიებაში მიიღო მონაწილეობა.

როგორც „ინტერპრესნიუსს“ საქართველოს განათლების, მეცნიერების, კულტურისა და სპორტის სამინისტროდან აცნობეს, მინისტრმა ღონისძიებაზე საზოგადოებას სიტყვით მიმართა და უნივერსიტეტის სტუდენტებს, აკადემიურ და ადმინისტრაციულ პერსონალს იუბილე მიულოცა.

„თელავის უნივერსიტეტი მეტია, ვიდრე საგანანმანათლებლო დაწესებულება - იგი ჩვენი კულტურისა და წიგნიერების ერთ-ერთი უმნიშვნელოვანესი ძეგლია, და, ამავდროულად, რეგიონისა და ქვეყნის თანამედროვეობის ძლიერი დასაყრდენი. მადლობას გიხდით პროფესორებსა და მეცნიერებს, ვინც დღეს გადასცემთ ფასდაუდებელ ცოდნასა და გამოცდილებას ქვეყნის ხვალინდელი დღის მშენებლებს - ახალგაზრდობას. სტუდენტებს, ვინც ცოდნის დაუფლებით არამხოლოდ საკუთარ ღირსეულ მომავალს, არამედ ახალ - განათლებულ და თავისუფალ ადამიანთა საქართველოს ქმნით. მადლობა ყველა თანამშრომელს, ვინც დაუღალავად ემსახურებით უნივერსიტეტის განვითარებას.

მინდა გაცნობოთ, რომ სამინისტროს უკვე დაგეგმილი აქვს თელავის სახელმწიფო უნივერსიტეტის გარე ფასადის განახლებისა და რეაბილიტაციის სამუშაოების დაფინანსება. ასევე, საერთაშორისო ფონდებთან ერთად, თელავის სახელმწიფო უნივერსიტეტის მეოთხე კორპუსის აღდგენა-რეაბილიტაციაში მონაწილეობა. განახლებული, თანამედროვე ლაბორატორიებით აღჭურვილი კორპუსი აგრარული მიმართულებით სამეცნიერო-კვლევითი სამუშაოების რეგიონულ ცენტრად ჩამოყალიბდება. გარდა ამისა, თელავის უნივერსიტეტის წიაღში მეღვინეობისა და მევენახეობის პროფესიული სასწავლებელი აღმოცენდება, რომელიც გერმანელ პარტნიორებთან თანამშრომლობით დაფუძნდება. ყველა სასიკეთო წამოწყებაში ჩვენი თანადგომა კვლავაც გაგრძელდება”, - განაცხადა მიხეილ ჩხენკელმა.

თელავის სახელმწიფო უნივერსიტეტის საიუბილეო ღონისძიება თელავის ვაჟა-ფშაველას სახელობის პროფესიულ სახელმწიფო დრამატულ თეატრში გაიმართა და მასში მონაწილეობა საქართველოს სხვადასხვა უნივერსიტეტის პროფესორ-მასწავლებლებმა და სტუდენტებმა მიიღეს.

საიუბილეო ღონისძიების ფარგლებში, უნივერსიტეტის ღვაწლმოსილი პედაგოგები და ერთიან ეროვნულ გამოცდებზე საუკეთესო შედეგის მქონე სტუდენტი დაასაჩუქრეს.

თელავის სახელმწიფო უნივერსიტეტი იყალთოს აკადემიისა და თელავის საფილოსოფოსო-საღვთისმეტყველო სკოლის უდიდესი ტრადიციების გამგრძელებელია.

1939 წელს თელავში სამასწავლებლო ინსტიტუტი ჩამოყალიბდა, რომელიც მოგვიანებით პედაგოგიურ ინსტიტუტად გადაკეთდა. 1999 წელს კი მას სახელმწიფო უნივერსიტეტის სტატუსი მიენიჭა.

იაკობ გოგებაშვილის სახელობის თელავის სახელმწიფო უნივერსიტეტი კახეთის რეგიონში ერთადერთი უმაღლესი საგანმანათლებლო დაწესებულებაა, რომელიც უდიდეს როლს ასრულებს რეგიონის სოციალურ-ეკონომიკურ და კულტურულ ცხოვრებაში.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
აკადემიკოსი გიორგი ჯაფარიძე - ქვეყანა რომ წარმოდგენილი იყოს მსოფლიოს სამეცნიერო რუკაზე, აუცილებელია მასში მცხოვრები მეცნიერები თავისი საქმიანობით მონაწილეობდნენ საერთაშორისო სამეცნიერო პროცესში
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს