ინფრასტრუქტურის მინისტრის მოადგილემ ბაკურიანში სასტუმროების მფლობელებს წყალმომარაგების სრულად აღდგენის მიზნით მიმდინარე სამუშაობის შესახებ ინფორმაცია მიაწოდა

რეგიონული განვითარებისა და ინფრასტრუქტურის მინისტრის მოადგილე, ილია ბეგიაშვილი, მხარის გუბერნატორთან, ბორჯომის მერთან და გაერთიანებული წყალმომარაგების კომპანიის წარმომადგენლებთან ერთად, ბაკურიანში სასტუმროების მფლობელებს და მენეჯერებს შეხვდა. ამის შესახებ „ინტერპრესნიუსს“ რეგიონალური განვითარებისა და ინფრასტრუქტურის სამინისტროდან აცნობეს.

მათივე ინფორმაციით, მინისტრის მოადგილემ შეხვედრის მონაწილეებს დეტალურ ინფორმაცია მიაწოდა წყალმომარაგების კუთხით არსებულ ვითარებაზე, მიმდინარე და დაგეგმილ სამუშაოებზე.

„შევეცადეთ მაქსიმალურად მიგვეწოდებინა ინფორმაცია იმის თაობაზე, რამ გამოიწვია ეს პრობლემები, ასევე - რას ვაკეთებთ ვითარების გასაუმჯობესებლად არამარტო დღეს და ერთჯერად რეჟიმში, არამედ პრობლემის სრულად აღმოსაფხვრელად. შევთანხმდით, რომ ოპერატიული რეაგირების მიზნით გვექნება უფრო მჭიდრო კომუნიკაცია,“ - აღნიშნა ილია ბეგიაშვილმა.

შეხვედრაზე მიღებულ ინფორმაციას დამაიმედებელს უწოდებენ სასტუმროების მფლობელები.

„შეთანხმება შედგა, მივიღეთ ინფორმაცია, რომ მაქსიმალურად ყველაფერი კეთდება, რაც კი შეიძლება ამ ეტაპზე გაკეთდეს, ამ პირობებში, კლიმატის და ყველა დეტალის გათვალისწინებით. მივიღეთ დაპირება, რომ ხვალიდან ბევრად უკეთესი ვითარება იქნება და სტაბილური წყალმომარაგება აღდგება,“ - აღნიშნა სასტუმრო „მგზავრების“ დირექტორმა ნათია ტრაპაიძემ.