ირანი „დიდ ტყუილს“ უწოდებს აშშ-ში გაკეთებულ განცხადებებს, რომ უკრაინული თვითმფრინავი შესაძლოა, რაკეტამ ჩამოაგდო
ირანი ამერიკის შეერთებულ შტატებს უკრაინის თვითმფრინავის კატასტროფის შესახებ „დიდ ტყუილში“ ადანაშაულებს. ამის შესახებ ინფორმაციას CNN ავრცელებს.
მათი ინფორმაციით, ირანმა ამერიკის შეერთებულ შტატებს მოუწოდა, „უკრაინის საერთაშორისო ავიახაზების“ თვითმფრინავის კატასტროფის შესახებ დაელოდოს გამოძიების შედეგებს, ხოლო აშშ-ს თანამდებობის პირების ბრალდებები, რომ „ბოინგ 737“ რაკეტებმა ჩამოაგდო, უარჰყო და „დიდ ტყუილად“ შეაფასა.
„Press TV”-ის მიერ გავრცელებული ინფორმაციის თანახმად, ირანის მთავრობის პრესსპიკერმა, ალი რაბიეიმ განაცხადა, რომ ასეთი დიდი სიცრუისთვის პასუხისმგებლობას არავინ აიღებს.
„ასეთი დიდი სიცრუისთვის პასუხისმგებლობას არავინ აიღებს მაშინ, როდესაც ცნობილი გახდება, რომ განცხადება სიცრუეა. სამწუხაროა, რომ შეერთებული შტატების მთავრობის ფსიქოლოგიური ოპერაცია და ისინი, ვინც ამას შეგნებულად თუ გაუცნობიერებლად მხარს უჭერენ, შეურაცხყოფას აყენებს იმ ოჯახების ტრავმას, რომელთაც ნათესავები დაკარგეს, და ასევე, მათ ამგვარი მცდარი ინფორმაციის გავრცელებით მსხვერპლად აქცევს გარკვეული მიზნებისთვის“, - აღნიშნა მან.
