საკრებულოებს საჯარო სამართლის იურიდიული პირის დაფუძნების უფლება ეძლევათ

საკრებულოებს საჯარო სამართლის იურიდიული პირის დაფუძნების უფლება ეძლევათ. პარლამენტის ბიუროს დღევანდელ სხდომაზე „ადგილობრივი თვითმმართველობის კოდექსში“ ცვლილებების პროექტი წარედგინა.

კანონპროექტის მიხედვით, საკრებულოს მიერ დაფუძნებული სსიპ-ების უფლებამოსილება იქნება: ადგილობრივი მოსაკრებლების ამოღება, ტერიტორიის კეთილმოწყობის და შესაბამისი საინჟინრო ინფრასტრუქტურის განვითარება, ქუჩების, პარკების, სკვერებისა და სხვა საჯარო ადგილების დასუფთავება, მუნიციპალური ნარჩენების მართვა, ადგილობრივი მნიშვნელობის საავტომობილო გზების მართვა, ავტოსატრანსპორტო საშუალებების პარკირების ადგილებით უზრუნველყოფა, მშენებლობის ნებართვის გაცემა, მშენებლობაზე საჯარო ზედამხედველობის განხორციელება, გარე რეკლამის განთავსების ადმინისტრირება, გარე განათების უზრუნველყოფა, ადგილობრივი მნიშვნელობის გზებზე საგზაო მოძრაობის ორგანიზება, მოსახლეობის მუნიციპალური ტრანსპორტით მომსახურების ორგანიზება, გარე ვაჭრობის ადმინისტრირება, გამოფენების, ბაზრებისა და ბაზრობების გამართვის ორგანიზება, ქუჩების, პარკების, სკვერებისა და სხვა საჯარო ადგილების გამწვანება, უპატრონო ცხოველებთან დაკავშირებული საკითხების გადაწყვეტა, ადგილობრივი მნიშვნელობის ობიექტებზე შეზღუდული შესაძლებლობის მქონე პირებისათვის, ბავშვებისა და მოხუცებისათვის სათანადო ინფრასტრუქტურის განვითარება.

კანონის პროექტის მიხედვით, საკრებულოების მიერ დაფუძნებული საჯარო სამართლის იურიდიული პირების საქმიანობის ვადა განისაზღვრება 2030 წლამდე პერიოდით. საკრებულოების მიერ შექმნილი სსიპ-ები მუნიციპალიტეტის ბიუჯეტიდან დაფინანსდება.

კანონპროექტის განმარტებით ბარათში მითითებულია, რომ საჯარო სამართლის იურიდიული პირის ხელმძღვანელის მაქსიმალური ხელფასი შეიძლება 6000 ლარს შეადგენდეს. რაც შეეხება საშტატო რიცხოვნობას, აღნიშნულ სსიპ-ებში, კანონპროექტის ინიციატორის ვარაუდით, 15-მდე ადამიანი იმუშავებს და მათი წლიური ხელფასი ჯამში, დაახლოებით, 600 000 ლარი იქნება.

მუნიციპალიტეტის მიერ დაფუძნებული საჯარო სამართლის იურიდიული პირისათვის მიმდინარე ხარჯები კი დაახლოებით, 2 000 000 – 2 500 000 ლარით განისაზღვრება.

კანონპროექტის ინიციატორი საქართველოს მთავრობაა.

ხათუნა ლაგაზიძე  - „ოცნება“ ისეთ თავდაღმართშია, ვერავინ გეტყვით, როდის, რა მომენტში აფეთქდება - პლებისციტზე საუბარმა აზრი დაკარგა, მოლაპარაკება აუცილებელია, მაგრამ უპირობოდ - რიგგარეშე არჩევნებზე
რა კრიტერიუმებს უნდა აკმაყოფილებდეს გერმანიაში სეზონურ სამუშაოზე წასვლის მსურველი და რა იქნება საქართველოს მოქალაქეების ანაზღაურება?
ქართული პრესის მიმოხილვა 09.03.2021
ალექსანდრე თვალჭრელიძე - ქართულმა პოლიტიკურმა სისტემამ მდგრადობა დაკარგა და გარე ჩარევის გარეშე მისი გამოსწორება შეუძლებელია
ტერაბანკი ქალთა საერთაშორისო დღის აღსანიშნავად
Mastercard-ის ხელშეწყობით, ყოველთვიური ვებინარების სერია: „კოვიდ 19 გავლენა ტურიზმზე: საქართველოს და მსოფლიო ტურიზმის ტენდენციები“ დაიწყო