დღეს, მოსკოვში, ლიბიის დაპირისპირებული მხარეები ცეცხლის შეწყვეტის შესახებ ხელშეკრულებას მოაწერენ ხელს. მედიის მიერ გავრცელებული ინფორმაციით, ლიბიის, გაეროს მიერ აღიარებული მთავრობის მეთაური ფაიზ ალ-სარაი და მისი მეტოქე, ლიბიის ეროვნული არმიის ლიდერი, ამბოხებული გენერალი ხალიფა ჰაფტარი უკვე მოსკოვში იმყოფებიან, სადაც ხელშეკრულების პირობებს საბოლოოდ შეათანხმებენ.

პაქტი, რომელიც მხარეებს შორის ფორმდება, ითვალისწინებს რუსეთისა და თურქეთის როლს სამშვიდობო მოლაპარაკებების პროცესში.

შეგახსენებთ, ამ დროისთვის ლიბია ორ ნაწილადაა გაყოფილი. დედაქალაქ ტრიპოლს გაეროს მიერ აღიარებული მთავრობა ხელმძღვანელობს, ხოლო ქვეყნის აღმოსავლეთ ნაწილს გენერალი ხალიფა ჰაფტარის რეჟიმი მართავს.

როგორც ცნობილია, ჰაფტარის რეჟიმს, რუსეთი, ეგვიპტე და საუდის არაბეთი ემხრობა.

ცოტა ხნის წინ, თურქეთმა, ოფიციალური ტრიპოლის მხარდასაჭერად ქვეყანაში ჯარები გაგზავნა.