გიორგი ვაშაძე - ჩვენ არ დავუშვებთ „ქართულმა ოცნებამ“ არსებული საარჩევნო სისტემის მანიპულაციებით ხელისუფლება შეინარჩუნოს
2020 წლის არჩევნების ჩატარების სისტემის ინიციატივას ოპოზიციაში კრიტიკით პასუხობენ. როგორც „ინტერპრესნიუსს“ „ახალი საქართველოდან“ აცნობეს, ხელისუფლების შემოთავაზებაზე ისინი უარს აცხადებენ.
მათივე ინფორმაციით, ბრძოლის სტრატეგია და გეგმები კვლავ უცვლელია.
„ახალი საქართველოს“ ლიდერს გიორგი ვაშაძეს მიაჩნია, რომ საარჩევნო სისტემაზე მანიპულირებით მმართველ გუნდს ხელისუფლების შენარჩუნება სურს.
„პირველ რიგში, ველოდებით ეუთო ოდირ-ის დასკვნას, რომელიც უახლოეს პერიოდში იქნება და მეორე, რაც მთავარია ჩვენ გვაქვს ძალიან მკაფიო გეგმა. ქვეყანაში არის უმძიმესი ვითარება და ამ უმძიმესი სოციალური, ეკონომიკური და პოლიტიკური ვითარებიდან ერთადერთი გამოსავალი არის ნორმალური არჩევნების ჩატარება. ეს ფორმულა, რომელიც დღეს არის წარმოდგენილი, არის ფორმულა, რომლითაც „ქართული ოცნება“ ხელისუფლებას მხოლოდ მანიპულაციებით შეინარჩუნებს, ამის უფლებას კი ჩვენ ვერ მივცემთ და არც დავუშვებთ“,- განაცხადა გიორგი ვაშაძემ.
