ბათუმის მერმა ლაშა კომახიძემ მრავალშვილიან ოჯახს ბინა გადასცა. ამის შესახებ, „ინტერპრესნიუსს“ ბათუმის მერიიდან აცნობეს.
მათივე ინფორმაციით, 128,50 კვმ საცხოვრებელი ფართი შერიფ ხიმშიაშვილის ქუჩის №1-ში მდებარეობს. ოჯახს ასევე 32 ათას 125 ლარი ბინაში სარემონტო სამუშაოების ჩასატარებლად ჩაერიცხა.
"მრავალშვილიანი ოჯახების საცხოვრებლით უზრუნველყოფის პროგრამის ფარგლებში, აფხაზავების მრავალშვილიან ოჯახს დღეს ბინა გადავეცით. ბათუმში ეს უკვე მე-13 ოჯახია, რომელმაც მერიისგან საჩუქრად საცხოვრებელი ბინა მიიღო",-განაცხადა ლაშა კომახიძემ.
ბათუმის მერიის ინფორმაციით, პროგრამის ფარგლებში, ბინები გადაეცემათ 2013 წლის 1-ელ იანვრამდე ბათუმში რეგისტრირებულ ოჯახებს, რომლებსაც 6-ზე მეტი შვილი ჰყავთ.