თბილისის საქალაქო სასამართლოში 20 ივნისის საქმეზე დაკავებული ზურაბ ბუდაღაშვილის, ბესიკ თამლიანის, ცოტნე სოსელიასა და კახაბერ კუპრეიშვილის სასამართლო პროცესი მიმდინარეობს.

სასამართლო სხდომას დაკავებული ოთხი პირიდან, მხოლოდ ბესიკ თამლიანი ესწრება.

ცოტნე სოსელიამ, კახაბერ კუპრეიშვილმა და ზურაბ ბუდაღაშვილმა სასამართლოსთვის წარდგენილ განცხადებაში სხდომაზე გამოცხადებაზე უარი განაცხადეს. აღნიშნული პირების უფლებებს სასამართლო სხდომაზე მათი ადვოკატები დაიცავენ.

დღევანდელ სხდომაზე ბრალდების მხარის მტკიცებულებებს გამოიკვლევენ, კერძოდ კი ბრალდების მხარის მოწმეებს დაკითხავენ.

ცნობისთვის, 20 ივნისის საქმეზე ზურაბ ბუდაღაშვილი, ბესიკ თამლიანი, ცოტნე სოსელია და კახაბერ კუპრეიშვილი არიან დაკავებული. მათ აღკვეთის ღონისძიების სახით პატიმრობა აქვთ შეფარდებული.

დაკავებულ პირებს ბრალი ედებათ ჯგუფურ მოქმედებში მონაწილეობაში, რასაც თან ახლდა რბევა, ძალადობა, სხვისი ნივთის დაზიანება და განადგურება, ასევე ხელისუფლების წარმომადგენლისადმი წინააღმდეგობა და მათზე თავდასხმა. აღნიშნული ბრალი 4-დან 6 წლამდე ვადით თავისუფლების აღკვეთას ითვალისწინებს.