ახალი კორონავირუსის გავრცელებამ შესაძლოა, ტოკიოს 2020 წლის ოლიმპიადის მზადებაზე გავლენა მოახდინოს. ამის შესახებ საორგანიზაციო კომიტეტის ხელმძღვანელმა ტოშირო მუტომ განაცხადა.
„მე ძალიან ვწუხვარ, რომ ამ ინფექციური დაავადების გავრცელებამ შესაძლოა, ოლიმპიადისთვის მზადებას ცივი წყალი გადაასხას. იმედი მაქვს, მისი შეჩერება შესაძლებელი გახდება“, - განაცხადა მუტომ.
მედიაში აქამდე გავრცელებულ ინფორმაციას, რომ ოლიმპიური თამაშები შესაძლოა, შეფერხდეს, იაპონელი მაღალჩინოსნები გამოეხმაურნენ. ტოკიოს მერის, იურიკო კოიკეს თქმით, ქვეყანა ყველაფერს აკეთებს, რომ ვირუსის გავრცელება შეაჩეროს.
განცხადება ქვეყნის პრემიერმა შინზო აბემაც გააკეთა. მისი თქმით, მთავრობა მუშაობს, რომ კორონავირუსმა ოლიმპიურ თამაშებზე მინიმალური გავლენა მოახდინოს.
ზაფხულის ოლიმპიური თამაშები იაპონიაში 24 ივლისს უნდა დაიწყოს.
