შერიგებისა და სამოქალაქო თანასწორობის საკითხებში სახელმწიფო მინისტრი ქეთევან ციხელაშვილი და მინისტრის მოადგილე ლია გიგაური გამყოფი ხაზის მიმდებარედ არსებულ საბავშვო ბაღებსა და სკოლებს ესტუმრნენ.

როგორც "ინტერპრესნიუსსს" უწყების პრესსამსახურიდან აცნობეს, სახელმწიფო მინისტრის მოადგილე ლია გიგაური, გორის მუნიციპალიტეტის მერის მოადგილესთან პაატა ივანიშვილთან და რესურსცენტრის ხელმძღვანელთან ერთად სკოლის მოსწავლეებსა და პედაგოგებს შეხვდა და საოკუპაციო ხაზთან მცხოვრები ახალგაზრდების ხელშეწყობის პროგრამებსა და შეღავათებზე ისაუბრა.

ლია გიგაურმა ახლად რეაბილიტირებულ სკოლის ბიბლიოთეკას საჩუქრად ქართველი და უცხოელი კლასიკოსებისა და თანამედროვე მწერლების ავტორობით წიგნები გადასცა. შეხვედრის დასასრულს მინისტრის მოადგილემ მოსწავლეებისა და პედაგოგების კითხვებს უპასუხა.

სახელმწიფო მინისტრის აპარატის ინფორმაციით, გორის მუნიციპალიტეტის სოფელ ქვეშში ამერიკის შეერთებული შტატების დაფინანსებით, სრულად რეაბილიტირებული სკოლა ერთი თვის წინ გაიხსნა.

სოფელი ქვეშის საჯარო სკოლა, სადაც 247 მოსწავლე სწავლობს, საოკუპაციო ხაზიდან ერთი კილომეტრის მოშორებით მდებარეობს.

შენობა სრულად შეესაბამება თანამედროვე სტანდარტებს.