ჩემთვის სულ ერთი არ არის რა მოხდება ივანიშვილის წასვლის შემდეგ, ივანიშვილი რომ წავა და დავამარცხებთ ნებისმიერი სისტემით ეს გასაგებია, მაგრამ მერე რა ხდება? - ამის შესახებ „სამოქალაქო მოძრაობის“ ლიდერმა ალეკო ელისაშვილმა „პალიტრანიუსის“ გადაცემაში „ნიუსრუმი“ განაცხადა.
ელისაშვილის თქმით, მომავალში ისეთი სისტემა უნდა შეიქმნას, რომელიც ავტომატურად გამორიცხავს ვინმეს ხელში ძალაუფლების ჩაგდებას.
„ქართულმა ოცნებამ“ ვერ გაამართლა, ეს ხალხი არის გასაშვები. მე ვარ ღრმად დარწმუნებული, რომ შერეული სისტემითაც შევძლებთ „ქართული ოცნების“ დამარცხებას, მაგრამ მარტო, მოდი ოღონდ ივანიშვილი გავუშვათ და მერე ქვა ქვაზე აღარ დარჩენილა ხომ არაა მხოლოდ? მერე რა მოხდება? ასეთი არჩევანი უნდა დამთავრდეს ქვეყანაში. ოღონდ გაგვეშვა და მერე არ ვიცოდით რა მოხდებოდა. მეც ძალიან გულანთებული ვიყავი და მეგონა, რომ სააკაშვილს გავუშვებდით და ბედნიერების ხანა დადგებოდა საქართველოში და ივერია გაბრწყინდებოდა, მაგრამ არ გაბრწყინდა ხო? მომავალზე უნდა ვიფიქროთ. მეორე დღეს როგორ საქართველოში ვიღვიძებთ? მე ვარ აბსოლუტურად დარწმუნებული, რომ 2020 წლის ოქტომბერი იქნება „ქართული ოცნების“ ხელისუფლებიდან გაშვების თვე და ამაში მე, ჩემი გუნდი და საერთოდ ყველა, ძალიან დიდ ძალისხმევას ჩავდებთ. ისეთი პოლიტიკური სისტემა უნდა შევქმნათ, რომ არანაირი სააკაშვილის შემოვარდნები და მეგის ქარდავას გაჯეჯილების საფრთხე არ იყოს. ოღონდ ეს ყველაფერი მუშტით და წიხლით კი არ უნდა ვქნათ, სისტემა უნდა შევქმნათ ისეთი, რომელიც ავტომატურად გამორიცხავს ვინმეს ხელში ძალაუფლების ჩაგდებას.“, - განაცხადა ელისაშვილმა.