აშშ-ის ქალაქ მილოუკიში, სასმელების კომპანია „მოლსონ კორსის“ შენობაში შეიარაღებული პირი შეიჭრა და სროლა ატეხა. დაღუპულია კომპანიის ხუთი თანამშრომელი და დაჭრილია რამდენიმე, - ამის შესახებ ინფორმაციას „სი-ენ-ენი“ ავრცელებს.
გამოცემის ცნობით, დაღუპულია 51 წლის თავდამსხმელიც, რომელიც იმავე ქალაქის მკვიდრია. მან ჭრილობა საკუთარი ცეცხლსასროლი იარაღით მიიყენა.
კომპლექსი, სადაც ინციდენტი მოხდა, ლუდის ორ ქარხანასა და კორპორატიულ ოფისებს აერთიანებს.
მომხდარზე კომენტარი აშშ-ის პრეზიდენტმა დონალდ ტრამპმაც გააკეთა. მან თავდამსხმელს „ბოროტი მკვლელი“ უწოდა და დაღუპულთა ოჯახებს მიუსამძიმრა.