ჩვენ, „ლელო საქართველოსთვის“ ყველა პატარა საკითხსაც კი ვეჭიდებით იმისთვის, რომ შეთანხმებას მივაღწიოთ , - ამის შესახებ პარტია „ლელო საქართველოსთვის“ წევრმა, დავით უსუფაშვილმა ჟურნალისტებს განუცხადა.

დავით უსუფაშვილის აზრით, კარგი ის არის, რომ „ორივე მხრიდან გვესმის ერთი და იმავე პრინციპი 40 %-ზე ნაკლები შედეგის მქონე პარტიამ ერთპიროვნულად ვერ მართოს ქვეყანა“.

„ამ პროცესში არ არის საჭირო გართულებები, ფაქტია, რომ ხელისუფლებამ ბოლოს და ბოლოს საერთაშორისო საზოგადოების პირდაპირი ჩარევის შემდეგ დაინახა, რომ შეთანხმება არის აუცილებელი. ახლა საჭიროა, მეტი გამძლეობა და მოთმინება მხოლოდ 110 /40-ში არ არის საქმე. ნაკლებად მნიშვნელოვანია საკითხი იმის შესახებ, თუ დარჩენილი 40 ოლქი, როგორი იქნება ზომაში თბილისიც ერთ მაჟორიტარს აირჩევს და სიღნაღიც? ხომ არ იქნება სწორი? იქ 50 000 ამომრჩეველია და აქ 900 000. მთავარი და კარგი ისაა, რომ ორივე მხრიდან გვესმის ერთი და იმავე პრინციპი, რომ 40 %-ზე ნაკლები შედეგის მქონე პარტიამ ერთპიროვნულად ვერ მართოს ქვეყანა. ამ პრინციპის ხორცშესხმის დეტალებზე მიდის არაფორმალური საუბარი. ელჩებთან ერთად რომ ვსადილობთ არ ნიშნავს იმას, რომ ამ თემაზე აღარ ვმუშაობთ“, - განაცხადა დავით უსუფაშვილმა.

დავით უსუფაშვილმა 40%-იანი პრინციპის მიღწევის საშუალებებზეც ისაუბრა. მისი თქმით, 40%-იანი პრინციპის მიღწევის ყველაზე მარტივი საშუალება 125/25-ზე პროპორციაა, რომელიც ყველაფერს არითმეტიკულად უზრუნველყოფს.