საქართველოს პარლამენტის თავმჯდომარე, არჩილ თალაკვაძე ევროკავშირის ელჩს, კარლ ჰარცელს შეხვდა. ამის შესახებ „ინტერპრესნიუსს“ საქართველოს პარლამენტიდან აცნობეს.

უწყების ინფორმაციით, შეხვედრაზე საუბარი შეეხო პოზიტიურ საერთაშორისო გამოხმაურებას ევროსტრუქტურების მხრიდან, რომელიც პარტიებს შორის მიღწეულ შეთანხმებას და პოლიტიკური დიალოგის წარმატებით დასრულებას მოჰყვა. ევროკავშირის ელჩმა დადებითად შეაფასა მიღწეული შეთანხმება და პარლამენტის თავმჯდომარეს მნიშვნელოვანი პროცესის წარმატებით დასრულება მიულოცა. არჩილ თალაკვაძემ კარლ ჰარცელს მადლობა გადაუხადა პროცესში მონაწილეობის და მისი წარმატებით დასრულებაში შეტანილი წვლილისთვის.

მათივე ცნობით, მხარეებმა განიხილეს საქართველოსა და ევროკავშირს შორის თანამშრომლობის სხვა მიმდინარე საკითხებიც, მათ შორის, ევროკავშირთან თავისუფალი ვაჭრობის ხელშეკრულების (DCFTA) განხორციელება და ხელშეკრულებით გათვალისწინებული შესაძლებლობების უკეთ გამოყენება.​