დეკანოზი გასწირეთ სიკვდილისთვის?! - აღნიშნული შინაარსის ტრანსპარანტით მსჯავრდებული დეკანოზის, გიორგი მამალაძის ძმა თორნიკე მამალაძე საქართველოს საპატრიარქოსთან მივიდა, სადაც წმინდა სინოდის სხდომა უნდა გაიმართოს.

„სინოდმა განიხილა ჩემი ძმის საკითხი და მიმართა პრეზიდენტს, მაგრამ ეს იყო დადგმული სპექტაკლი და ფარსი, რადგანაც სინოდის მიღმა პატრიარქი სინოდს შეუთანხმდა და ჩემი ძმა საპყრობილეში დატოვა. ახლა, როდესაც ჩვენ სასამართლოს სასჯელის გადავადების თაობაზე მივმართეთ, მოსამართლემ, რომელიც საპატრიარქოს უნივერსიტეტში მუშაობდა, პატრიარქთან შეთანხმებით პარალიზებული ადამიანი საპყრობილეში დატოვა. აქ იმისათვის მოვედი, რომ ჩემი აზრით, დღევანდელი სინოდის სხდომა ისევ ფარსია. რა ვირუსთან დაკავშირებით აპირებს სინოდი მსჯელობას? ამ ადამიანებს მოვუწოდებ, რომ რა ვირუსიც საქართველოს საპატრიარქოში არსებობს, ვალდებულნი არიან ამაზე იმსჯელონ და ადეკვატური გადაწყვეტილებები მიიღონ", - განაცხადა თორნიკე მამალაძემ.