სამხრეთ აფრიკა ზიმბაბვესთან 40 - კილომეტრიან ღობეს ააშენებს, რათა კორონავირუსის გავრცელების შემთხვევაში მიგრანტთა ნაკადი შეაკავოს. ინფორმაციას „ალ ჯაზირა“ ავრცელებს.

ამასთან, პრეზიდენტ კირის რამაფოზას ბრძანებით, 53 სასაზღვრო გამშვები პუნქტიდან 35 დაიხურა.

„40 -კილომეტრიანი ღობის აშენება ერთ თვეში დასრულდება. ჩვენ ქსენოფობიურად არ ვიქცევით. ჩვენ კონსულტაციები ბევრ მეზობელ ქვეყანასთან გავიარეთ. სამხრეთ აფრიკამ საკუთარი მოქალაქეები უნდა დაიცვას. ჩვენ გვყავს პროფესიონალები, ვინც საზღვრებთან სკრინინგს ჩაატარებენ და ტესტებს აიღებენ, მაგრამ იმის შესაძლებლობა არ გვაქვს, რომ თუ ვინმეს ქვეყანაში შემოსვლა უნდა, ამის უფლება მივცეთ“, - აცხადებს სამხრეთ აფრიკის შრომის მინისტრი პატრისია დე ლილე.

ცნობისთვის, სამხრეთ აფრიკაში, რომელიც რეგიონის ყველაზე განვითარებული ქვეყანაა, ამ დროისთვის კორონავირუსით ინფიცირების 150 შემთხვევაა დაფიქსირებული. რაც შეეხება ზიმბაბვეს, მსოფლიო ჯანდაცვის ორგანიზაციის ბაზაში, ქვეყნაში ინფიცირებულთა შესახებ ინფორმაცია არ მოიპოვება.