თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის თერაპევტის, ლალი ტურძელაძის განცხადებით, მათთან მოთავსებული 80 წლის ქალის ჯანმრთელობის მდგომარეობა შედარებით დამძიმდა.
როგორც ლალი ტურძელაძემ ჟურნალისტებთან საუბარში აღნიშნა, მათ კლინიკაში მოთავსებული 12-ვე პაციენტი საყურადღებოა, რადგან თერაპევტის თქმითვე, ისინი ერთი დღე კარგად არიან, მეორე დღეს კი მდგომარეობა ისევ რთულდება.
„საყურადღებო გახდა 80 წლის ქალბატონი, რომელიც მანამდეც ჩვენთან მკურნალობდა, მას მაღალი ტემპერატურა აქვს. ყველას, 12-ვე პაციენტს, რომლებიც კორონავირუსით არიან ინფიცირებულები, ინტენსიური მეთვალყურეობა და მკურნალობა სჭირდებათ. ერთი დღე უკეთესად არიან, შემდეგ ისევ რთულდება მდგომარეობა. დინამიკა საკმაოდ დატვირთულია. 62 წლის ქალბატონის მდგომარება შედარებით დამძიმდა. ისედაც ვამბობდით, რომ საშუალო სიმძიმის იყო და უფრო დამძიმდა“, - განაცხადა ტურძელაძემ.
რაც შეეხება მარნეულიდან გადმოყვანილ 62 წლის ქალსა და მისი ოჯახის წევრებს, როგორც ტურძელაძე აღნიშნავს, ამ ქალის მდგომარეობა საყურადღებოა, მისი ოჯახის წევრების მდგომარეობა კი სტაბილურია.
„არის დედა, ორი შვილი და კიდევ ერთი ნათესავი, მეც ამ ოჯახში შევდივარო, ასე ამბობს. ერთი ახალგაზრდა ბიჭია, სამი ქალბატონია. 55-ის, 25-ის, 18-ის და 16 წლის არიან. დედის და ორი შვილის მდგომარეობა საშუალო სიმძიმისაა, ნათესავი ქალბატონის უფრო მსუბუქია. 62 წლის ქალბატონის მდგომარეობა ძალიან საყურადღებოა, პარამეტრები ცოტა უმჯობესდება, ძალიან გვიხარია, მაგრამ ვფრთხილობთ, მდგომარეობა ისევ, რა თქმა უნდა, ძალიან მძიმეა, თუმცა, სტაბილური. წყაროს ძიება მიმდინარეობს, თუ რით დასნებოვნდა 62 წლის ქალბატონი, რომელიც აპარატულ სუნთქვაზეა ახლა, პირველი კონტაქტი დაზუსტებული არ არის“, - აცხადებს ტურძელაძე.
მისივე განმარტებით, ლუგარის ლაბორატორიაში გუშინ გაგზავნილი 18 ანალიზიდან ყველას პასუხი უარყოფითია. დღეს დილით კი, 11 პაციენტის ანალიზები გაგზავნეს.