“საქსტატის” დირექტორი - 2020 წლის თებერვალში, საქართველოს ეკონომიკა 2.2%-ით გაიზარდა

2020 წლის თებერვალში, წინა წლის შესაბამის პერიოდთან შედარებით, რეალური მშპ-ის ზრდის ტემპი გარკვეულწილად შენელდა და სახეზე გვაქვს საქართველოს ეკონომიკის 2.2%-იანი ზრდა, - ამის შესახებ სტატისტიკის ეროვნული სამსახურის დირექტორმა გოგიტა თოდრაძემ ბრიფინგზე განაცხადა.

მისი ინფორმაციით, იანვარი-თებერვლის საშუალო რეალური ზრდა 3.7%-ით განისაზღვრა. როგორც გოგიტა თოდრაძემ ბრიფინგზე განაცხადა, 2020 წლის თებერვალში, წინა წლის შესაბამის პერიოდთან შედარებით, შემცირდა ექსპორტის მაჩვენებელი. ამასთან, მიმდინარე წლის თებერვლის მონაცემებით, შემცირებულია ახალი დარეგისტრირებული საწარმოთა რაოდენობაც.

„2020 წლის თებერვალში ეკონომიკური ზრდის შედარებით დაბალი მაჩვენებელი განპირობებულია კლების ტენდენციის გამოვლენით ძირითადად დამამუშავებელი მრეწველობის, მშენებლობის, ტრანსპორტისა და დასაწყობების, ხელოვნების, გართობის და დასვენების სექტორებში. მიუხედავად ამისა 2020 წლის თებერვალში ზრდის ტენდენცია ნარჩუნდება საფინანსო საქმიანობის, ვაჭრობის, ინფორმაციისა და კომუნიკაციის, სასტუმროებისა და რესტორნების და უძრავ ქონებასთან დაკავშირებული საქმიანობების სექტორებში. საქონლის ექსპორტი 2020 წლის თებერვალში, წინა წლის შესაბამის პერიოდთან შედარებით, შემცირდა 0.5%-ით და 264 მლნ დოლარი შეადგინა, თუმცა იანვარი - თებერვლის მაჩვენებელი 4.5%-ით არის გაზრდილი. რაც შეეხება იმპორტის მაჩვენებელს, თებერვალში გაიზარდა 8.4%-ით და 703 მლნ ამერიკულ დოლარს გადააჭარბა. 2020 წლის თებერვალში საქართველოში დარეგისტრირდა 3 969 ახალი საწარმო. აღნიშნული მაჩვენებელი წინა წლის შესაბამის პერიოდთან შედარებით შემცირებულია 8.9%-ით. ეკონომიკური ზრდის წინაწარი შეფასებისას გამოყენებული დღგ-ს გადამხდელ საწარმოთა ბრუნვის მოცულობა დაახლოებით 6.3 მილიარდი ლარია და აღნიშნული მაჩვენებელი წინა წლის შესაბამის პერიოდთან შედარებით გაიზარდა 10.5%-ით,“ - განაცხადა გოგიტა თოდრაძემ.