სახალხო დამცველმა ყველაზე გახმაურებული საქმეებიდან გამომდინარე, 2019 წლის ანგარიშში რამდენიმე უწყებას რეკომენდაციით მიმართა
სახალხო დამცველის აპარატმა ყველაზე გახმაურებული საქმეებიდან გამომდინარე, 2019 წლის ანგარიშში რამდენიმე უწყებას რეკომენდაციით მიმართა.
მათ შორის სახალხო დამცველმა საქართველოს პარლამეტს მოუწოდა „საქართველოს სახალხო დამცველის შესახებ“ ორგანულ კანონში ცვლილებები შეიტანოს და სახალხო დამცველს მიენიჭოს გამოძიების დასრულებამდე არასათანადო მოპყრობის ან/და სიცოცხლის ხელყოფის ფაქტის გამოძიების მასალების გაცნობის უფლებამოსილება.
რეკომენდაციები მიმართული იყო ქვეყნის გენერალური პროკურატურისადმიც.
„განაახლოს და ეფექტიანად წარმართოს თემირლან მაჩალიკაშვილის სიცოცხლის ხელყოფის ფაქტზე შეწყვეტილი გამოძიება.
ხორავას ქუჩაზე არასრუწლოვანთა მკვლელობის გამოძიებაში დადგენილი ხარვეზების საფუძველზე დაწყებული სამსახურებრივი შემოწმების შედეგები პერიოდულად მიაწოდოს საზოგადოებას, შემოწმების მასალები კი, გააცნოს სახალხო დამცველის აპარატს;
სამსახურებრივი შემოწმების შედეგების საფუძველზე იმსჯელოს სამსახურებრივი გულგრილობის ან უფლებამოსილების გადამეტების მუხლებით გამოძიების დაწყების მიზანშეწონილობაზე.
საქართველოს პარლამენტის რეგლამენტის 172-ე მუხლის შესაბამისად წარდგენილ ანგარიშში, საქართველოს გენერალურმა პროკურორმა წარმოადგინოს ინფორმაცია სიცოცხლის უფლების ხელყოფის გამოძიების ეფექტიანობის თაობაზე. სიცოცხლის უფლების ხელყოფის გამოძიების ფარგლებში, მიაწოდოს მოთხოვნილი ინფორმაცია სახალხო დამცველის აპარატს საგამოძიებო და საპროცესო მოქმედებათა შესახებ, შესაბამისი თარიღების მითითებით.
ამასთანავე სახალხო დამცველმა რეკომენდაციეი მისცა ჯანდაცვის სამინისტროსაც და მოუწოდა შეიტანოს ცვლილება ფსიქიკური ჯანმრთელობის პროგრამაში და გაითვალისწინოს ფსიქიატრიულ სტაციონარში მოთავსებული პაციენტების სომატური ჯანმრთელობის მკურნალობის საკითხი.
