საარჩევნო კოდექსის ცვლილებაზე კანონპროექტის პარლამენტში ინიცირება უახლოეს მომავალში მოხდება. როგორც პარლამენტის ყოფილმა თავმჯდომარემ, საპარლამენტო უმრავლესობის წევრმა ირაკლი კობახიძემ ჟურნალისტებს განუცხადა, აღნიშნულ საკითხთან დაკავშირებით საბოლოო კონსულტაციები დისტანციურ რეჟიმში გაიმართა.

„ამ თემასთან დაკავშირებით დღეს ბოლო შეხვედრა გვქონდა დისტანციურ რეჟიმში და უახლოეს მომავალში შევიტანთ შესაბამის ცვლილებებს იმ პროექტში, რომელიც იყო წარდგენილი სხვადასხვა სუბიექტის წინაშე. საბოლოო სახით კანონპროექტი უკვე დაინიცირდება საქართველოს პარლამენტში და ეს ინიციატივა კონსტიტუციურ კანონთან ერთიან პაკეტში შევა. ყველა საკითხზე შეთანხმება არის რთული რამ, თუმცა ყველა პრინციპულ საკითხი შეიძლება ითქვას, რომ შეთანხმებული იქნება და ასეთი სახით დაინიცირდება კანონპროექტი პარლამენტში”, - განაცხადა კობახიძემ.

შეგახსენებთ, რომ საარჩევნო სისტემის ცვლილებაზე კონსტიტუციური კანონის პროექტი პარლამენტში 2020 წლის 11 მარტს დაინიცირდა. პროექტის მიხედვით, 2020 წლის საპარლამენტო არჩევნები შერეული საარჩევნო სისტემითა (120 პროპორციული, 30 მაჟორიტარული) და 1%-იანი ბარიერით ჩატარდება. 2020 წლის საპარლამენტო არჩევნების ამ მოდელით ჩასატარებლად, კონსტიტუციის ცვლილებასთან ერთად, საჭიროა საარჩევნო კოდექსის ცვლილებაც და მისი კონსტიტუციასთან შესაბამისობაში მოყვანა.