თბილისის ზღვის ჰოსპიტალში კორონავირუსი 6 პაციენტს დაუდასტურდა. ამის შესახებ თბილისის ზღვის ჰოსპიტლის დირექტორმა თეა ახალაძემ ჟურნალისტებს განუცხადა.
ახალაძის ინფორმაციით, მის კლინიკაში შეყვანილ არც ერთ მგზავრს, რომლებიც გუშინ ბერლინიდან სპეციალური რეისით ჩამოფრინდნენ, კორონავირუსი არ დაუდგინდა.
„გუშინ ჩვენს კლინიკაში შემოსული იყო 33 პაციენტი, რომელთაგან იყვნენ მგზავრები, რომლებიც აეროპორტიდან გადმოიყვანეს. საბედნიეროდ, არც ერთ პაციენტს არ დაუდასტურდა კორონავირუსის შემთხვევა. შესაბამისად, პრობლემა ამ მიმართულებით არ გვაქვს. გუშინ იყო აღებული 23 ანალიზი ლუგარის ლაბორატორიის მიერ და აქედან ექვსი შემთხვევა დადასტურდა, როგორც კორონავირუსის შემთხვევა, ერთ შემთხვევაზე კვლავ მიმდინარეობს კვლევა. კორონავირუსის დადასტურებული შემთხვევების გადამისამართება ახლა მიმდინარეობს სხვა კლინიკებში“ , – განაცხადა თეა ახალაძემ.
რაც შეეხება დღეს, კორონავირუსით გარდაცვლილ მეორე პაციენტს, ახალაძის თქმით, აღნიშნული პირი მის კლინიკაში 1-ელ აპრილს მძიმე მდგომარეობაში შეიყვანეს, ხოლო „როგორც კი დაუდასტურდა კორონავირუსი, გადაყვანილი იყო პირველ საუნივერსიტეტო კლინიკაში“.
ცნობისთვის, ამ ეტაპზე საქართველოში კორონავირუსით ინფიცირების 170 შემთხვევაა დადასტურებული, მათგან 36 უკვე გამოჯანმრთელდა, ხოლო 2 გარდაიცვალა.