თბილისის ინფექციური საავადმყოფოს სამედიცინო დირექტორის მარინა ეზუგბაიას განცხადებით, სამედიცინო ცენტრში მოთავსებული ერთ-ერთი პაციენტის ჯანმრთელობის მდგომარეობა კრიტიკულია. როგორც მან ჟურნალისტებს განუცხადა, ხუთი პაციენტის მდგომარეობა, რომლებსაც პნევმონია აღენიშნებათ, სტაბილურია.

„როგორც იცით, ჩვენს ცენტრში ერთი პაციენტი არის კრიტიკული მდგომარეობით, რომლის ზოგადი მდგომარეობა აღარ პროგრესირებს და თუ რამდენიმე დღეში სტაბილიზირება ასეთი დაგვრჩება, მერე შესაძლებელია, პროგნოზზე საუბარი. მძიმე პნევმონიის მქონე ხუთი პაციენტის მდგომარეობა სტაბილურია. იმედი გვაქვს, რომ ისინი ნელ-ნელა კარგი შედეგების პაციენტებთან გადმოინაცვლებენ“,- აცხადებს ეზუგბაია.

ცნობისთვის, სპეციალურად შექმნილ საიტზე, stopcov.ge-ზე განთავსებული ბოლო მონაცემების თანახმად, ქვეყანაში კორონავირუსით ინფიცირების შემთხვევათა რაოდენობა 174-ს შეადგენს. მათგან გამოჯანმრთელებულია 36 პაციენტი. გარდაიცვალა 2 ადამიანი. ამ დროისთვის კარანტინში იმყოფება 5067 ადამიანი, ხოლო სტაციონარში მეთვალყურეობის ქვეშ - 330 პირი.